Fitch qaroridan so‘ng UzNIF qimmatli qog‘ozlari Londonda 32% gacha qimmatlashdi

Fitch Ratings agentligi O‘zbekistonning suveren kredit reytingi bo‘yicha prognozni “barqaror”dan “ijobiy”ga oshirgach, Milliy investitsiya fondi (UzNIF) qimmatli qog‘ozlarining qiymati keskin o‘sdi.

3-iyun kuni London fond birjasidagi savdolar davomida fondning global depozitar tilxatlari (GDR) narxi qariyb $33 ga yetdi. Bu IPO vaqtida belgilangan $25 lik joylashtirish narxidan 32% dan ortiq yuqori hisoblanadi.

Fitch agentligi reyting prognozi bo‘yicha yangilangan qarorini Toshkent vaqti bilan soat 12:53 da e’lon qilgan. Shundan so‘ng qimmatli qog‘ozlar narxining o‘sishi tezlashib, savdolarning eng yuqori nuqtasi taxminan soat 14:15 da qayd etilgan. Kun yakunida GDRlar narxi $32 atrofida shakllangan.

UzNIF IPO’si 13-may kuni bir vaqtning o‘zida Respublika fond birjasi “Toshkent” va London fond birjasida o‘tkazilgan edi. Greenshoe opsiyasi bilan birga joylashtirishning umumiy hajmi qariyb $692 mlnni tashkil qilgan.

Mahalliy bozorda aksiyalar bir dona uchun 4,65 so‘mdan joylashtirilgan bo‘lsa, ayrim chakana investorlar uchun 5% chegirma qo‘llanilib, narx 4,41 so‘mni tashkil etgan. London fond birjasida esa bir dona GDR $25 dan sotilgan.

Hozirda UzNIF aksiyalari Respublika fond birjasi “Toshkent”da 5,5–5,65 so‘m oralig‘ida savdolanmoqda. Bu joylashtirish narxiga nisbatan 18–21% yuqori ko‘rsatkichdir.

O‘zbekiston 2030-yilgacha investitsion darajadagi “BBB” reytingini olishni maqsad qilgan. Mutaxassislar fikricha, bunday natijaga erishish xalqaro institutsional investorlar sonining ko‘payishiga va mamlakat kapital bozoriga qiziqishning ortishiga xizmat qilishi mumkin.