O‘zbekiston sentabr oyida ham oltin eksport qilmadi

O‘zbekistonda avgust oyida to‘xtatilgan oltin eksporti sentabrda ham amalga oshirilmadi. Bu Milliy statistika qo‘mitasining 2026-yil yanvar–sentabr oylaridagi tashqi savdo bo‘yicha hisobotida keltirilgan.

Hisobotga ko‘ra, to‘qqiz oyda mamlakat eksporti $25,8 mlrdni tashkil etdi. Bu 2025-yilning shu davriga nisbatan 5,5% ga kam.

Eksport hajmining qisqarishiga, asosan, qimmatbaho metallar yetkazib berishning kamayishi ta’sir ko‘rsatgan. Biroq oltindan tashqari boshqa tovarlar eksporti va xizmatlar savdosida o‘sish kuzatilgan.

Jumladan, oltindan tashqari tovarlar eksportidan tushgan daromad 31,6% ga oshib, $13,3 mlrdga yetgan. Xizmatlar eksporti esa 31,1% ga o‘sib, $9,71 mlrdni tashkil qilgan.

Yanvar–sentabr oylarida oltin eksportidan tushgan jami tushum $2,8 mlrd bo‘lgan. 2025-yilning mos davrida bu ko‘rsatkich $9,8 mlrdni tashkil etgan. Shu tariqa, oltin eksporti qiymati bir yil ichida qariyb 3,5 barobar kamaygan.

O‘zbekiston 2026-yilda oltinni faqat ikki oy eksport qildi

Joriy yilda O‘zbekiston oltinni faqat aprel va iyul oylarida eksport qilgan. Aprelda qimmatbaho metall eksporti $1,5 mlrdni, iyulda esa $1,3 mlrdni tashkil etgan.

Shundan keyin, jumladan, avgust va sentabr oylarida oltin eksporti qayd etilmagan.

Taqqoslash uchun, 2025-yil yakunida O‘zbekiston oltin eksporti bo‘yicha rekord natijaga erishgan. O‘sha yili qimmatbaho metall yetkazib berish qiymati $9,9 mlrddan oshgan.

O‘zbekiston xalqaro zaxiralari hajmi sentabr oyida $5,5 mlrdga kamayib, $72,1 mlrddan $66,6 mlrdgacha tushdi. Asosiy pasayish zaxiralarning oltin qismiga to‘g‘ri keldi. Uning qiymati bir oyda $4,8 mlrdga kamayib, $64,9 mlrddan $60,1 mlrdgacha tushgan. Shu bilan birga, zaxiralardagi oltinning fizik hajmi 14,1 mln troya unsiyasidan 14,3 mln troya unsiyasigacha oshgan.