“Imarat Development” qurilish kompaniyasiga nisbatan jinoyat ishi qo‘zg‘atildi

Kompaniya xaridorlarga Toshkent shahrida qurilishi rejalashtirilgan uylarni taklif qilgan, biroq binolar aslida Toshkent viloyatining Quyi Chirchiq tumanida joylashgani aniqlangan

Sergeli tumanining Buyuk avlod shohko‘chasida ofisi joylashgan “Imarat Development” qurilish kompaniyasiga nisbatan jinoyat ishi ochildi. Bu haqda Toshkent shahar IIBB xabar berdi.

Ma’lum bo‘lishicha, bir necha fuqaro “Imarat Development” MCHJ faoliyatidan norozi bo‘lib, jamiyat rahbariyatiga nisbatan qonuniy chora ko‘rishni so‘rab murojaat qilgan.

O‘tkazilgan tekshiruvlar davomida MCHJ tomonidan qurilishi rejalashtirilgan ko‘p qavatli turar joy binolari aslida Toshkent viloyatining Quyi Chirchiq tumani hududida joylashgani aniqlangan. Ushbu holatdan xabar topgan xaridorlar norozilik bildirib, xonadonlar uchun to‘lagan mablag‘larini qaytarishni so‘ragan, biroq kompaniya pulni qaytarib bermagan.

Mazkur holat yuzasidan Toshkent shahar IIBB huzuridagi Tergov boshqarmasi tomonidan Jinoyat kodeksining 168-moddasi (firibgarlik) hamda 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) alomatlari bilan jinoyat ishi qo‘zg‘atildi.