O‘zbekistonning oltin-valyuta zaxiralari sentabr oyida $5,5 mlrdga kamaydi

O‘zbekiston xalqaro zaxiralari hajmi sentabr oyida $5,5 mlrdga kamayib, $72,1 mlrddan $66,6 mlrdgacha tushdi. Bu haqda Markaziy bankning 1-oktabr holatidagi xalqaro zaxiralar bo‘yicha ma’lumotlarida keltirilgan.

Asosiy pasayish zaxiralarning oltin qismiga to‘g‘ri keldi. Uning qiymati bir oyda $4,8 mlrdga kamayib, $64,9 mlrddan $60,1 mlrdgacha tushgan.

Shu bilan birga, zaxiralardagi oltinning fizik hajmi 14,1 mln troya unsiyasidan 14,3 mln troya unsiyasigacha oshgan. Demak, oltin zaxirasi qiymatining pasayishi qimmatbaho metall miqdorining kamayishi bilan emas, balki uning bozor qiymati qayta baholangani bilan bog‘liq.

Sentabr oyida London Fixing bo‘yicha oltinning o‘rtacha narxi 9% ga pasayib, bir troya unsiyasi uchun $4 188,75 ni tashkil etdi. 7-oktabr holatiga oltin kotirovkasi bir unsiya uchun $4 119 ni tashkil qilgan.

Zaxiralarning valyuta qismi ham bir oyda qisqardi — $6,6 mlrddan $5,9 mlrdgacha.

Markaziy bank portfelidagi xalqaro qimmatli qog‘ozlar hajmi sentabr oyida o‘zgarmay, $1,8 mlrd darajasida qoldi. Ularning xalqaro zaxiralarning umumiy hajmidagi ulushi qariyb 2,5% ni tashkil etdi.

O‘zbekiston xalqaro zaxiralarining qariyb 90%i oltin hissasiga to‘g‘ri keladi.