Biznes hisoblarini soliq nizolari vaqtida bloklash bo‘yicha loyiha Senatga yuborildi

Oliy Majlis Qonunchilik palatasi tijorat subyektlarining bank operatsiyalarini aniqlangan huquqbuzarliklar sababli to‘xtatish tartibini belgilovchi qonun loyihasini ikkinchi va uchinchi o‘qishda qabul qildi. Bu haqda parlament quyi palatasi matbuot xizmati xabar berdi.

Mazkur o‘zgartirishlar tashabbuskori Oliy sud hisoblanadi. 14-aprel kuni birinchi o‘qishda ma’qullangan hujjat Soliq kodeksi hamda Iqtisodiy protsessual kodeksga o‘zgartirishlar kiritishni nazarda tutadi. Asosiy maqsad — davlat organlari o‘rtasida vakolatlarni aniq taqsimlashdan iborat.

Yangi normalarga ko‘ra, agar yuridik shaxs o‘z aybini to‘liq tan olsa va aniqlangan huquqbuzarliklarga e’tiroz bildirmasa, soliq organi uning hisob raqamlarini mustaqil ravishda muzlatish huquqiga ega bo‘ladi.

Kompaniya barcha kamchiliklarni bartaraf etgach, tegishli organ qo‘shimcha tartiblarsiz cheklovlarni bekor qilishi mumkin. Bunda ish boshqa instansiyalarga o‘tkazilmaydi, bu esa korxonalarga muammolarni tezroq hal qilib, faoliyatini operativ tiklash imkonini beradi.

Agar xo‘jalik yurituvchi subyekt bildirilgan da’volarga rozi bo‘lmasa, tranzaksiyalarni to‘xtatish faqat iqtisodiy sud tomonidan qo‘llaniladi. Bunday holatda davlat organiga 3 kun ichida sudga tegishli da’vo arizasini kiritish majburiyati yuklatiladi.

Ikkinchi o‘qishga qadar loyiha ekspertlar xulosalari va deputatlar takliflari asosida takomillashtirildi. Hozirda hujjat parlament yuqori palatasi — Senatga yuborilgan bo‘lib, undan keyin Prezident imzosiga taqdim etiladi.

Amaldagi qonunchilikka ko‘ra, soliq organlari rahbariyati sud qarorisiz hisoblarni 10 kungacha cheklashi mumkin, undan ortiq muddat esa faqat sud qarori asosida qo‘llanadi.