Soliq nizolarida biznes hisoblarini bloklash sudlarga o‘tkaziladi

O‘zbekiston Oliy Majlisi Qonunchilik palatasi tadbirkorlarning bank hisobvaraqlari bo‘yicha operatsiyalarni cheklash tartibini o‘zgartirishni nazarda tutuvchi qonun loyihasini birinchi o‘qishda ma’qulladi. Endilikda nizoli holatlarda bunday qarorlar sud tomonidan qabul qilinishi ko‘zda tutilmoqda.

Qonun loyihasi Oliy sud tashabbusi bilan ishlab chiqilgan bo‘lib, Soliq kodeksi va Iqtisodiy protsessual kodeksga o‘zgartirishlar kiritishni nazarda tutadi. Hujjat davlat organlari va sudlar vakolatlarini aniq ajratishga qaratilgan.

Yangi tartibga ko‘ra, agar tadbirkor aniqlangan huquqbuzarlikni tan olsa, hisoblar bo‘yicha operatsiyalarni cheklash soliq organlari tomonidan amalga oshiriladi. Kamchiliklar bartaraf etilgach, ushbu cheklovlarni bekor qilish vakolati ham inspeksiyaga beriladi. Bu esa biznesga muammolarni tezroq hal qilib, faoliyatni tiklash imkonini beradi.

Agar tadbirkor e’tiroz bildirsa, hisoblarni bloklash faqat iqtisodiy sud qarori bilan amalga oshiriladi. Bunday holatda soliq organi kompaniya e’tiroz bildirgan kundan boshlab 3 kun ichida sudga da’vo arizasi kiritishi shart. Da’voga huquqbuzarlik sodir etilgani va tadbirkor oldindan xabardor qilingani bo‘yicha dalillar ilova qilinadi.

Sud arizani rad etsa yoki tadbirkor kamchiliklarni bartaraf etgani tan olinsa, hisoblar bo‘yicha operatsiyalar sud qarori kuchga kirishi bilan darhol tiklanadi.

Hozirgi amaldagi tartibga ko‘ra, soliq organlari rahbarlari yoki ularning o‘rinbosarlari kompaniya hisoblarini 10 kungacha mustaqil ravishda bloklashi mumkin. Ushbu muddatni uzaytirish uchun esa sud qarori talab etiladi.