Sifatsiz tovarlar uchun marketpleys sotuvchilariga javobgarlik belgilandi

Shavkat Mirziyoyev 10-sentabr kuni O‘zbekistonda elektron tijoratni tartibga solishni kuchaytirishga qaratilgan qonunni imzoladi. Bu haqda Adliya vazirligining Huquqiy axborot kanali xabar berdi.

Hujjat bilan elektron tijorat sohasidagi tomonlarning huquq va majburiyatlarini aniqlashtirishga qaratilgan qator qonunchilik hujjatlariga o‘zgartirish va qo‘shimchalar kiritildi. Qonun loyihasi Oliy Majlis Qonunchilik palatasi tomonidan fevral oyida qabul qilingan va may oyida Senat tomonidan ma’qullangan.

Qonunda transchegaraviy elektron tijorat tushunchasi ham huquqiy jihatdan belgilandi. Unga ko‘ra, elektron tijorat operatsiyasi ishtirokchilari, jumladan operatorlar, turli davlatlarda joylashgan bo‘lsa va ulardan kamida biri O‘zbekistonda bo‘lsa, bunday operatsiya transchegaraviy elektron tijorat hisoblanadi.

Shuningdek, marketpleyslar orqali tovar yetkazib beruvchi yuridik shaxslarga yuborilgan qog‘oz va elektron hujjatlar, agar elektron xizmatlar O‘zbekistonda realizatsiya qilinsa, yuborilgan kundan 30 kun o‘tgach olingan deb hisoblanadi.

Qonunda sotuvchining javobgarligi ham belgilangan. Jumladan, sotuvchi elektron tijorat operatorlari tizimlari orqali tuzilgan shartnomalar bo‘yicha o‘z faoliyatiga doir majburiyatlarni bajarishi, shuningdek, sifatsiz tovar va xizmatlarni yetkazib berish yoki sifatsiz nooziq-ovqat mahsulotlarini almashtirish bilan bog‘liq xaridorlar bilan nizolar yuzaga kelganda javobgar bo‘ladi.

Bundan tashqari, sotuvchi xaridorning qonuniy talablarini qondira olmaydigan holatlar ham tartibga solindi. Agar shartnomada yoki qonunchilikda boshqacha tartib belgilanmagan bo‘lsa, elektron tijorat operatori xaridor oldida subsidiar javobgarlikka ega bo‘ladi.

Qonun rasmiy e’lon qilinganidan uch oy o‘tgach kuchga kiradi.