SAFE Service SafeRoad foydalanuvchilari ma’lumotlari sizib chiqqani haqidagi xabarlarni rad etdi

SAFE Service kompaniyasi SafeRoad foydalanuvchilarining shaxsiy ma’lumotlari sizib chiqqani haqidagi internetda tarqalgan xabarlar uning faoliyatiga aloqador emasligini bildirdi. Kompaniya ma’lum qilishicha, tarqalgan ma’lumotlar ilova ishga tushirilishidan oldin turli manbalardan yig‘ilgan.

Avvalroq ijtimoiy tarmoqlarda SafeRoad, inDrive, Lada Auto, KiwiTaxi va Fargo kabi bir nechta servislarning ma’lumotlar bazasi sizib chiqqan bo‘lishi mumkinligi haqida xabarlar tarqalgan edi.

Ushbu xabarlarda pasport ma’lumotlari, JShShIR, telefon raqamlari, yashash manzillari va avtomobillarga oid ma’lumotlar ochiq foydalanish imkoniyati bo‘lgan manbalarga tushib qolgani aytilgan. Shuningdek, bu ma’lumotlar Telegram-botlar orqali tarqatilayotgani haqida xabar berilgan. Biroq ehtimoliy sizib chiqish ko‘lami va ma’lumotlar manbalariga oid axborot hozircha tasdiqlanmagan.

SAFE Service foydalanuvchilarning shaxsiy ma’lumotlari himoyalangan serverlarda saqlanishi va shifrlangan shaklda uzatilishini ta’kidladi. Kompaniya, shuningdek, noto‘g‘ri ma’lumotlar tarqatilishi munosabati bilan tegishli choralar ko‘rilganini ma’lum qildi.

Eslatib o‘tamiz, 2026-yil 1-sentabrdan boshlab rebrending doirasida SafeRoad brendi SAFE Service nomiga o‘zgartirilgan. Kompaniya foydalanuvchilarni axborot olishda rasmiy manbalarga tayanishga chaqirdi.