Oybek Tursunov Perfectum bosh ofisi va 2 mingdan ortiq aktivini 98,4 mlrd so‘mga sotib oladi

Oybek Tursunov Perfectum aloqa operatorining Toshkent shahridagi bosh ofisi joylashgan ko‘chmas mulk majmuasi va 2 mingdan ortiq asosiy vositasini qariyb 98,4 mlrd so‘mga sotib oladi. Bu haqda Korporativ axborot yagona portalida e’lon qilingan ma’lumotlarda keltirilgan.

16-oktabr kuni Perfectum operatorining yuridik egasi hisoblangan Rubicon Wireless Communication aksiyadorlarining navbatdan tashqari yig‘ilishi bo‘lib o‘tgan. Unda kompaniya mol-mulkini Oybek Tursunovga sotish bo‘yicha bitim ma’qullangan.

Qo‘shilgan qiymat solig‘ini (QQS) hisobga olgan holda, bitimning umumiy qiymati 98 mlrd 374 mln so‘mni tashkil etadi.

Qanday aktivlar sotiladi?

Bitim doirasida Toshkent shahri Mirobod tumani, Taras Shevchenko ko‘chasi, 21-uyda joylashgan ko‘chmas mulk majmuasi sotiladi. Perfectum bosh ofisi joylashgan ushbu majmua 65 mlrd 968 mln so‘mga baholangan.

Majmua umumiy maydoni 7 283 kvadrat metr bo‘lgan yer uchastkasida joylashgan to‘rtta binodan iborat. Binolarning umumiy maydoni 10 479 kvadrat metrni tashkil etadi.

Shuningdek, bitimga kompaniyaga tegishli 2 012 ta asosiy vosita ham kiritilgan. Ularning qiymati 32 mlrd 406 mln so‘mga baholangan.

Oybek Tursunov haqida

Oybek Tursunov “Promadik Invest” kompaniyasiga egalik qiladi va “Kapitalbank” aksiyalarining eng yirik ulushdorlaridan biri hisoblanadi.

Avvalroq VEON kompaniyasi Perfectum’ni $207 mln evaziga sotib olishi haqida xabar berilgan edi. Keyinchalik Raqobat qo‘mitasi ushbu bitimga ruxsat bergan.