O‘zbekistonda ilk islomiy bank litsenziyasi “Open bank”ga berildi

Markaziy bank “Open bank” aksiyadorlik jamiyatiga islomiy bank faoliyatini amalga oshirish uchun O‘zbekistondagi ilk litsenziyani berdi. Tegishli qaror 2026-yil 23-oktabrda qabul qilingan.

Markaziy bank boshqaruvining 28/1-sonli qaroriga muvofiq, bankka islomiy bank faoliyatini amalga oshirish huquqini beruvchi 1-I-sonli litsenziya berildi. U “Banklar va bank faoliyati to‘g‘risida”gi qonunning 5¹-moddasida nazarda tutilgan islomiy moliya operatsiyalarini amalga oshirishni qamrab oladi.

Regulyator bank xizmatlaridan foydalanishdan oldin moliya tashkilotining tegishli litsenziyasi borligini Markaziy bankning rasmiy veb-sayti orqali tekshirishni tavsiya qildi.

“Open bank” haqida

“Open bank” 2022-yil 24-dekabrda ro‘yxatdan o‘tkazilgan. Org.info ma’lumotlariga ko‘ra, bankning ustav fondi 500 mlrd so‘mni tashkil etadi. Bank rahbari — Azamat To‘rayev, uning yagona ta’sischisi esa “Future Open Technology Group” AJ hisoblanadi.

2025-yil sentabr oyida “Smartbank” nomi “Open bank”ga o‘zgartirilgan. O‘sha paytda bank aksiyalarining 85,1 foizi “Future Open Technology Group”ga, 10 foizi Komilxo‘ja Sultonovga va 4,9 foizi Zafar Adilovga tegishli bo‘lgan.