O‘zbekiston metall qazib olishga $500 mln jalb qilib, Tojikistondan 700 ming tonna xomashyo sotib oladi

Shavkat Mirziyoyev metallurgiya sohasini rivojlantirishga bag‘ishlangan yig‘ilishda Tojikistondan xomashyo yetkazib berishni yo‘lga qo‘yish va O‘zbekistonda metall rudasi qazib olish hajmini oshirish bo‘yicha topshiriqlar berdi. Bu haqda Prezident matbuot xizmati xabar qildi.

Yig‘ilishda po‘lat ishlab chiqarish tarmog‘ini rivojlantirish istiqbollari muhokama qilindi. Ta’kidlanishicha, mamlakat hududida zarur xomashyoning yirik zaxiralari mavjud bo‘lib, ularning umumiy hajmi 1,5 mlrd tonnaga baholanadi. Ushbu konlarni faol o‘zlashtirish zarurligi qayd etildi.

2027-yildan boshlab “O‘zmetkombinat” “Surun-ota” konidan temir rudasi konsentratini ola boshlashi kutilmoqda. Investitsiya shartnomasiga muvofiq, xitoylik hamkorlar ushbu kon hududida yiliga 650 ming tonna xomashyoni qayta ishlashni yo‘lga qo‘yadi. Bundan tashqari, uch-to‘rt yil ichida Tebinbuloq konida qazib olish ishlari boshlanishi rejalashtirilgan bo‘lib, bu qo‘shimcha ravishda yiliga 1 mln tonna po‘lat ishlab chiqarish imkonini beradi.

Hukumat metallurgiya sohasiga xorijiy investorlarni faolroq jalb etishni rejalashtirmoqda. Qayd etilishicha, investorlar geologik qidiruvdan tortib tayyor metall mahsulotlari ishlab chiqarishgacha bo‘lgan to‘liq ishlab chiqarish zanjirini yo‘lga qo‘yishga tayyor. Jumladan, kompaniyalardan biri Samarqand viloyatidagi qazib olish loyihalariga $500 mlngacha investitsiya kiritishni rejalashtirmoqda.

Shuningdek, “O‘zmetkombinat” Jizzax viloyatining Forish tumanida 32 mln tonna xomashyo zaxirasini o‘zlashtirishni rejalashtirmoqda. Dastlabki geologik tadqiqotlar Toshkent va Surxondaryo viloyatlarida ham metall zaxiralari mavjudligini ko‘rsatgan.

Yirik loyihalarni amalga oshirish uchun po‘lat sifatini yaxshilovchi marganets va ferrosilisiy zarurligi ta’kidlandi. Shu munosabat bilan yangi istiqbolli hududlarni o‘rganish va foydali qazilmalar zaxirasini ko‘paytirish bo‘yicha reja ishlab chiqish topshirildi.

Qo‘shni davlatlardan xomashyo importini uzluksiz ta’minlash ham ustuvor yo‘nalish sifatida belgilandi. Shu munosabat bilan Tojikistondan 700 ming tonna xomashyo xarid qilish bo‘yicha shartnomani tezkor imzolash va uni kelgusi yildan amalga oshirish vazifasi qo‘yildi.