O‘zbekiston may oyida oltin eksportini yana to‘xtatdi

O‘zbekiston may oyida qisqa muddatli tiklanishdan so‘ng qimmatbaho metall eksportini yana to‘xtatdi. Bu haqda Milliy statistika qo‘mitasi ma’lumotlarida keltirilgan.

2026-yilning yanvar–may oylarida mamlakat eksporti $12,6 mlrdni tashkil etgan. Bu o‘tgan yilning mos davriga nisbatan 15,5% ga kam bo‘lib, pasayish asosan oltin eksportining qisqarishi bilan izohlanmoqda.

Shu bilan birga, boshqa yo‘nalishlarda ijobiy dinamika kuzatildi. Xizmatlar eksporti 34,9% ga oshib, $4,58 mlrdga yetdi. Sanoat mahsulotlari eksporti esa 18% ga o‘sib, $1,9 mlrdni tashkil etdi.

Yil boshidan buyon oltin eksportidan tushgan daromad $1,5 mlrdni tashkil etdi. Bu 2025-yilning shu davridagi $6,49 mlrdlik ko‘rsatkichdan 4,3 baravar kam.

Davlat aprel oyida olti oylik tanaffusdan so‘ng oltin sotishni qayta boshlagan edi. Biroq may oyida eksport yana to‘liq to‘xtatildi.

Eksportning to‘xtatilishi jahon bozorida oltin narxining pasayishi bilan bir vaqtga to‘g‘ri keldi. Iyun boshida bir unsiya oltin narxi qariyb $4, 5 mingni tashkil etgan bo‘lsa, oy oxiriga kelib $4 mingdan pastga tushdi.

Bunga qadar O‘zbekiston xalqaro bozorga oxirgi marta 2025-yil kuzida $1,47 mlrdlik oltin partiyasini eksport qilgan edi. O‘tgan yil yakunida esa oltin eksportidan tushgan umumiy daromad $9,9 mlrddan oshib, rekord natijani qayd etgan.

May oyi oxiriga kelib mamlakatning oltin-valyuta zaxiralari $70,58 mlrdni tashkil etdi. Bu bir oy avvalgiga nisbatan $307,2 mlnga kam. Markaziy bank zaxiralaridagi oltinning qiymati $61,43 mlrdgacha pasaygan bo‘lsa-da, metallning jismoniy hajmi 423 tonnaga yetdi. Bir oy davomida zaxiralar qariyb 9,3 tonna oltin bilan to‘ldirildi.

Jahon oltin kengashi ma’lumotlariga ko‘ra, 2026-yilning dastlabki to‘rt oyida O‘zbekiston oltin xarid qiluvchi eng yirik ikki davlat qatoridan joy oldi. Aprel oyida Markaziy bank 1 tonna oltin sotgan bo‘lsa-da, yil boshidan buyon zaxiralarini umumiy hisobda 24 tonnaga oshirdi.