Toshkentda jamoat transporti uchun yo‘l haqini 2,5 ming so‘mgacha oshirish taklif qilindi

Toshkentda 1-oktabrdan jamoat transportida bir martalik yo‘l haqini elektron to‘lovda 2,5 ming so‘m etib belgilash taklif qilinmoqda. Naqd pulda to‘lov tarifini esa 3 ming so‘m miqdorida saqlab qolish rejalashtirilgan. Toshkent shahar Kengashi qarori loyihasi 19-sentabrga qadar muhokama uchun joylashtirilgan.

Loyihaga ko‘ra, yangi cheklangan tariflarni poytaxtdagi avtobus yo‘nalishlari va metropolitenda joriy etish taklif qilinmoqda. Bir martalik safar uchun elektron to‘lovda, rag‘batlantiruvchi chegirmani hisobga olgan holda, yo‘lovchi 47% ko‘proq — 2,5 ming so‘m (hozir 1,7 ming so‘m), naqd pulda esa 3 ming so‘m to‘laydi. Bagaj olib yurish haqini 4 ming so‘m etib belgilash taklif qilinmoqda. Barcha summalar QQS bilan ko‘rsatilgan.

Elektron yo‘l haqi tarifini oshirish jamoat transportini subsidiyalash xarajatlari ortib borayotgan bir paytda taklif qilinmoqda. Prognozga ko‘ra, 2026-yilda ko‘rsatiladigan xizmatlar hajmi 2,3 trln so‘mni tashkil etsa, yo‘l haqi to‘lovlaridan tushum atigi 630 mlrd so‘m yoki qariyb 27,4% ni tashkil qiladi. Budjetdan moliyalashtirishga bo‘lgan ehtiyoj esa taxminan 1,7 trln so‘mga baholanmoqda.

Loyihada transport kartalari uchun safarlar soniga qarab yangi tarif rejalari, shuningdek, bir soat ichida jamoat transporti turlari o‘rtasida almashib o‘tilganda imtiyozli va bepul tariflarni joriy etish ham nazarda tutilgan.

Faqat avtobuslarda safar qilish uchun quyidagi cheklanmagan tariflar taklif etilmoqda:

• 1 kunga (6 ta safar) — 11,5 ming so‘m, 23% chegirma;
• 5 kunga (22 ta safar) — 42,5 ming so‘m, 23% chegirma;
• 7 kunga (28 ta safar) — 54 ming so‘m, 23% chegirma;
• 10 kunga (44 ta safar) — 84,5 ming so‘m, 23% chegirma;
• 15 kunga (66 ta safar) — 127 ming so‘m, 23% chegirma;
• 20 kunga (88 ta safar) — 169,5 ming so‘m, 23% chegirma;
• 30 kunga (130 ta safar) — 250 ming so‘m, 23% chegirma;
• 1 oyga (130 ta safar) — 250 ming so‘m, 23% chegirma;
• 3 oyga (390 ta safar) — 682,5 ming so‘m, 30% chegirma;
• 6 oyga (780 ta safar) — 1,17 mln so‘m, 40% chegirma;
• 1 yilga (1560 ta safar) — 1,95 mln so‘m, 50% chegirma.

Avtobus va metroda safar qilish uchun quyidagi cheklanmagan tariflar taklif etilmoqda:

• 1 kunga (7 ta safar) — 13,5 ming so‘m, 23% chegirma;
• 5 kunga (30 ta safar) — 57,5 ming so‘m, 23% chegirma;
• 7 kunga (38 ta safar) — 73 ming so‘m, 23% chegirma;
• 10 kunga (60 ta safar) — 115,5 ming so‘m, 23% chegirma;
• 15 kunga (90 ta safar) — 173 ming so‘m, 23% chegirma;
• 20 kunga (120 ta safar) — 231 ming so‘m, 23% chegirma;
• 30 kunga (180 ta safar) — 345 ming so‘m, 23% chegirma;
• 1 oyga (180 ta safar) — 345 ming so‘m, 23% chegirma;
• 3 oyga (540 ta safar) — 945 ming so‘m, 30% chegirma;
• 6 oyga (1080 ta safar) — 1,62 mln so‘m, 40% chegirma;
• 1 yilga (2160 ta safar) — 2,7 mln so‘m, 50% chegirma.

Bundan tashqari, to‘liq narxga nisbatan 23 foiz chegirma bilan safar paketlarini joriy etish taklif qilinmoqda:

• 10 ta safar — 19 ming so‘m;
• 20 ta safar — 38,5 ming so‘m;
• 30 ta safar — 57,5 ming so‘m.

Loyihada bir soat ichida transport almashtirishdagi chegirmalar tizimini saqlab qolish taklif qilinmoqda. Faqat avtobuslarda safar qilinganda birinchi safar 2,5 ming so‘m, ikkinchisi 1,5 ming so‘m bo‘ladi, bir soat ichidagi uchinchi va undan keyingi safarlar esa bepul bo‘ladi.

Avtobus va metro birgalikda ishlatilganda ham birinchi safar 2,5 ming so‘m, keyingi almashib o‘tishlar esa safarlar ketma-ketligiga qarab 1,5 ming so‘m yoki bepul bo‘ladi. Bir soatlik tarif doirasida metrodan faqat bir marta foydalanish taklif etilmoqda. Metroga qayta kirilsa, 60 daqiqalik vaqt yangidan hisoblana boshlaydi.

Avgust oyida Iqtisodiyot va moliya vazirligi huzuridagi Yashirin iqtisodiyot ulushini qisqartirish instituti jamoat transporti tariflarini bosqichma-bosqich iqtisodiy asoslangan darajaga yaqinlashtirishni taklif qilgan edi.

Institut ma’lumotlariga ko‘ra, 2026-yilda jamoat transporti uchun subsidiyalar 1,385 trln so‘mga yetgan. Toshkentda transport tizimi xarajatlarining 65,1%i subsidiyalar hisobidan qoplanmoqda. Shuningdek, kam yuklangan yo‘nalishlarni optimallashtirish va tashuvchilarga to‘lovlarni xizmat sifati ko‘rsatkichlariga bog‘lash taklif qilingan.

Toshkent jamoat transportida yo‘l haqi so‘nggi marta 2023-yil noyabrda 1,4 ming so‘mdan 1,7 ming so‘mga oshirilgan edi.