YTTB va YIB Qambarota GES-1 qurilishini moliyalashtiradi

O‘zbekiston, Qozog‘iston va Qirg‘iziston Kambarota-1 gidroelektr stansiyasini qurish uchun xalqaro moliyaviy institutlardan moliyalashtirish olishni rejalashtirmoqda. Bu haqda Energetika vazirligi matbuot xizmati xabar berdi.

Bryusselda 9–10 oktabr kunlari bo‘lib o‘tgan Global Gateway forumida uch davlat energetika vazirlari Yevropa tiklanish va taraqqiyot banki prezidenti Odil Reno-Basso hamda Yevropa investitsiya banki rahbariyati bilan loyiha moliyalashtirilishi bo‘yicha memorandumlar imzoladilar.

Tadbirda, shuningdek, Italiya banki Cassa Depositi e Prestiti vakillari va Yevropa Ittifoqining xalqaro hamkorlik bo‘yicha komissari Yozef Sikela ishtirok etdi. Bundan tashqari, forum doirasida Markaziy Osiyoda hamkorlik bo‘yicha muloqot ham o‘tkazildi, unda mintaqaning barcha besh davlati energetika idoralari vakillari qatnashdi.

Avvalroq loyiha asosiy parametrlari ma’lum qilingan edi: Kambarota GES-1 quvvati 1860 MVtni tashkil etadi. Uning faoliyatini ta’minlash uchun 5,4 mlrd kub metr hajmdagi suv ombori barpo etilishi rejalashtirilgan.

Joriy yilning iyun oyida Vena shahrida Qirg‘izistonning Xalqaro energetika investitsiya forumi o‘tkazildi. Unda O‘zbekiston, Qozog‘iston va Qirg‘iziston energetika vazirliklari Qambarota GES-1 ni qurish va ishlatishga tayyorgarlik ko‘rish bo‘yicha uch tomonlama kelishuvni imzoladilar. Tadbir doirasida Muvofiqlashtiruvchi donorlar qo‘mitasi ham tashkil etildi. Loyihaning dastlabki qiymati $4,5 mlrdga baholanmoqda.