YTTB ikki yillik Star Ventures dasturiga arizalar qabulini boshladi

Yevropa Tiklanish va Taraqqiyot Banki (YeBRR) Star Ventures dasturida ishtirok etish uchun yangi arizalarni qabul qilishni boshladi. Bu haqda moliya tashkiloti rasmiy veb-saytida ma’lum qilindi.

Ikki yillik loyiha o‘sish imkoniyati katta bo‘lgan va faoliyatini kengaytirishga tayyor yangi kompaniyalarni qo‘llab-quvvatlashga qaratilgan. Dastur ishtirokchilari o‘zlariga mos rivojlanish strategiyasini ishlab chiqish, investorlar uchun jozibadorligini oshirish va xalqaro bozorlarga chiqish imkoniyatiga ega bo‘ladilar.

Star Ventures doirasida startap asoschilari akseleratsiya bosqichidan so‘ng strategiya bo‘yicha mentorlik yordami va shaxsiy maslahatlar oladi. Shuningdek, ular faoliyatni kengaytirish uchun zarur kapitalni jalb qilish maqsadida investorlar bilan aloqalar o‘rnatish imkoniyatiga ega bo‘ladi.

Dasturda innovatsion yechimlar yoki texnologiyaga asoslangan, tez kengayish imkoniyatiga ega biznes-modellarni taklif qiluvchi kompaniyalar ishtirok etishi mumkin. Ruxsat etilgan yo‘nalishlar qatoriga texnologik ishlanmalar, ishlab chiqarish, SaaS xizmatlari, servis sohasi, elektron tijorat, ijtimoiy platformalar, yuqori texnologiyali va DeepTech yo‘nalishlari kiradi.

Loyiha Yevropa Ittifoqining kichik va o‘rta biznes mezonlariga mos bo‘lishi kerak: xodimlar soni 250 nafargacha, aktivlar qiymati 43 mln yevrodan oshmasligi lozim. Bundan tashqari, quyidagi talablar mavjud:

• yillik aylanma 1 mln yevrodan oshmasligi kerak;
• faoliyat kamida biror YeBRR a’zo davlatida amalga oshirilishi lozim;
• asosiy egalar loyiha yuritilayotgan mamlakat fuqarolari bo‘lishi kerak;
• kompaniya 10 yildan oldin tashkil etilmagan bo‘lishi kerak.

Arizalar 30-noyabrgacha qabul qilinadi.