YeTTB “Meros Pharm” kompaniyasiga logistika uchun $25 mln ajratadi

Yevropa tiklanish va taraqqiyot banki “Meros Pharm” kompaniyasiga $25 mlngacha kredit ajratishi haqida Prezident matbuot xizmati Kapital.uz’ga xabar berdi.

Mablag‘ mintaqaviy ombor tarmog‘ini kengaytirish rejasi doirasida aylanma kapitalini to‘ldirishga yo‘naltiriladi. Ajratilgan mablag‘lar “Meros Pharm” ga talab yuqori bo‘lgan davrlarda tovar zaxiralarini samarali boshqarish imkonini ham beradi.

Kompaniyaning logistika infratuzilmasini rivojlantirish bozordagi raqobatni kuchaytirishi, yetkazib berish muddatlarini qisqartirishi va aholining sifatli hamda arzon dori vositalariga erishish imkoniyatini yaxshilashi kutilmoqda.

YeTTB ko‘magida “Meros Pharm” korporativ boshqaruv va tarqatish tizimining takomillashgan standartlarini joriy etmoqchi. Loyiha, shuningdek, hukumatning sohani tartibga solish va uning shaffofligini oshirish bo‘yicha sa’y-harakatlarini qo‘llab-quvvatlaydi.