Jizzaxda 9,8 tonna oltinni noqonuniy qazib olgan fuqaro qamaldi

Jizzax viloyati G‘allaorol tumanida foydali qazilmalarni noqonuniy qazib olish bilan bog‘liq jinoyat ishi bo‘yicha sud hukmi e’lon qilindi. Bu haqda Tog‘-kon sanoati va geologiya sohasini nazorat qilish inspeksiyasi axborot xizmati xabar berdi.

Inspeksiya ma’lumotlariga ko‘ra, 2026-yilning dastlabki to‘qqiz oyida Marjonbuloq mahallasidagi oltin boyitish koni hududida iqtisodiy huquqbuzarliklar, jumladan, oltin o‘g‘irlash holatlari aniqlangan. Ushbu holatlar bo‘yicha aybdorlarga nisbatan sud tartibida choralar ko‘rilmoqda.

Sudda ko‘rib chiqilgan ish materiallariga ko‘ra, G‘allaorol tumanidagi G‘ubdun QFYda yashovchi, 2001-yilda tug‘ilgan fuqaro 2026-yil aprel oyida Uzunbuloq QFY hududidagi Morguzar tog‘ tizmasidan tegishli ruxsatsiz 9 840 kilogramm oltin tarkibli foydali qazilmani qazib olgan. U qazib olingan xomashyoni o‘z uyida saqlagan.

Sud majlisida sudlanuvchi va guvohlarning ko‘rsatmalari, shuningdek, jinoyat ishi doirasida to‘plangan dalillar o‘rganib chiqildi.

Sud hukmi bilan fuqaro Jinoyat kodeksining 196-1-moddasi 3-qismi “a” bandida nazarda tutilgan foydali qazilmalarni ruxsatnomasiz qazib olish jinoyatini sodir etganlikda aybdor deb topildi.

Unga Jinoyat kodeksining 57-moddasi qo‘llanilib, 2 yil 6 oy muddatga ozodlikdan mahrum qilish jazosi tayinlandi. Sudlanuvchi jazoni umumiy tartibli koloniyada o‘taydi. U sud zalining o‘zida qamoqqa olindi.