Yangi Bank binosi 163 mlrd so‘mga auksionga qo‘yildi

Tijorat banki Yangi Bankning tugatish komissiyasi moliya muassasasining Toshkent shahri Yunusobod tumanida joylashgan sobiq bosh ofisini sotuvga chiqardi. Tegishli lot E-auksion elektron platformasiga joylashtirilgan.

2017-yilda qurilgan besh qavatli bino Amir Temur shohko‘chasida, “Bodomzor” metro bekati va Milliy bank (NBU)ning bosh binosi yaqinida joylashgan.

Binoning umumiy maydoni 3,6 ming kvadrat metrni tashkil etadi. Shundan 2,5 ming kvadrat metri foydali maydon hisoblanadi. Unga tutash yer uchastkasi 0,25 gektarni egallaydi. Ichki qismida 47 ta xizmat xonasi mavjud bo‘lib, elektr ta’minoti, gaz, suv va kanalizatsiya kabi barcha zarur muhandislik-kommunikatsiya tarmoqlari bilan ta’minlangan.

Ko‘chmas mulkning boshlang‘ich narxi 163,3 mlrd so‘m etib belgilangan.

Savdolarda ishtirok etish uchun da’vogarlar 1,6 mlrd so‘m miqdorida kafolat puli kiritishi lozim. Ochiq auksion savdolari 20-iyul kuni soat 10:00 ga rejalashtirilgan, arizalarni qabul qilish esa shu kuni soat 09:00 da yakunlanadi.

2026-yil yanvar oyida O‘zbekiston Markaziy banki prudensial me’yorlarni muntazam ravishda buzish va rekord darajadagi moliyaviy yo‘qotishlar sabab Yangi Bankning litsenziyasini bekor qilgan edi.

Bank faoliyati to‘xtatilgan paytda uning taqsimlanmagan zarari 171 mlrd so‘mga yetgan, o‘z kapitali esa qonunchilikda belgilangan 500 mlrd so‘mlik minimal talabga nisbatan 182,9 mlrd so‘mgacha tushib ketgan.