O‘zbekistonda xususiy klinikalarga davlat hisobidan tibbiy xizmat ko‘rsatishga ruxsat beriladi

2026-yil 1-iyuldan boshlab O‘zbekistonda nodavlat tibbiyot muassasalari davlat tibbiy sug‘urtasi tizimi doirasida aholiga xizmat ko‘rsatish huquqiga ega bo‘ladi. Bu haqda Prezident matbuot xizmati xabar berdi.

Qayd etilishicha, mazkur qaror sog‘liqni saqlash tizimida xususiy sektor ulushini kengaytirish va xizmatlar sifatini oshirishga qaratilgan. Rejalarga ko‘ra, 2030-yilgacha nodavlat tibbiyot tashkilotlarining umumiy tibbiy xizmatlar hajmidagi ulushi 30% ga yetkaziladi.

Yangi tartibga ko‘ra, xususiy klinikalar o‘z litsenziyasiga mos barcha yo‘nalishlar bo‘yicha davlat sug‘urtasi doirasida bemorlarni davolashi mumkin bo‘ladi. Davlat va xususiy tibbiyot muassasalari uchun yagona bazaviy tariflar joriy etilib, davolanish xarajatlari byudjet mablag‘lari hisobidan qoplanadi.

Milliy akkreditatsiyadan o‘tgan yoki xalqaro sertifikatga ega klinikalar Davlat tibbiy sug‘urta jamg‘armasi bilan bevosita shartnoma tuzish imkoniga ega bo‘ladi. Ular qo‘shimcha ekspertiza tekshiruvlaridan ozod etiladi.

Shuningdek, ixtisoslashgan ambulator davolanish va jarrohlik amaliyotlari uchun yo‘llanma berish tizimi joriy etiladi. Mablag‘larni alohida shifoxonalarga taqsimlash amaliyoti bekor qilinib, moliyalashtirish kasallik profili asosida oyma-oy amalga oshiriladi.

2027-yil 1-maydan boshlab akkreditatsiyadan o‘tgan xususiy markazlarga organ va to‘qimalarni transplantatsiya qilishga ham ruxsat beriladi. Ushbu operatsiyalar yuqori xavf toifasiga kiritilib, qat’iy talablar asosida amalga oshiriladi.

Donor va retsipientlar haqidagi barcha ma’lumotlar Sog‘liqni saqlash vazirligiga taqdim etiladi. Shuningdek, operatsiyadan keyingi reabilitatsiya tartibi belgilanishi hamda bemorga zarar yetkazilgan taqdirda klinikalarning javobgarligi kuchaytiriladi.