O‘zbekiston Xitoy–Afg‘oniston yo‘nalishida yangi tranzit yo‘lakni ishga tushirdi

“O‘ztemiryo‘lkonteyner” kompaniyasi Xitoydan Afg‘onistonga yuk tashishni O‘zbekiston hududi orqali yo‘lga qo‘ydi. Bu haqda korxona matbuot xizmati xabar berdi.

Yangi logistika loyihasi mintaqadagi transport yo‘laklarini kengaytirishga qaratilgan. Konteyner poyezdlari Xitoyning Szinhua, Sian va Urumchi shaharlaridan jo‘nab, Qozog‘istonning Oltynko‘l stansiyasi orqali O‘zbekistonga kiradi va Buxorodagi yuk terminaliga yetib keladi.

Buxoro hududida konteynerlar temiryo‘l platformalaridan avtomobillarga yuklanadi. Shundan so‘ng yuklar Turkmaniston orqali Afg‘onistonning Hirot shahriga yetkaziladi. Marshrutning umumiy uzunligi 7,4 ming kilometrni tashkil etadi.

Yuk tashish jarayoni o‘rtacha 30 kun davom etadi. Kompaniya vakillariga ko‘ra, ushbu yo‘nalish logistika samaradorligini oshirib, yetkazib berish muddatini qisqartiradi.

Avval ushbu yo‘nalishda yuklar asosan dengiz orqali Eronning Bandar-Abbos portigacha olib borilib, keyin quruqlik orqali Afg‘onistonga yetkazilar edi.