“Xalq nazorati” elektron platformasi endi butun O‘zbekistonda ishga tushiriladi

Bu murojaatlarning yagona platformasiga aylantirilib, unga barcha vazirlik, idora, hokimliklar ulanadi

Фото: Абдумавлон Мадмусаев / Kapital.uz

Shavkat Mirziyoyev 16-iyundagi yig‘ilishda Hisob palatasiga bir oy ichida Toshkent shahrida o‘zini oqlagan “Xalq nazorati” elektron portalini butun respublikada ishga tushirishni topshirdi. Bu haqda Prezident matbuot xizmati xabar qildi.

Bu tizim murojaatlarning yagona platformasi bo‘ladi va unga barcha vazirlik, idora, hokimliklar ulanadi.

Portal 2020-yil may oyida ishga tushirilgan. U orqali aholi qurilish, obodonlashtirish va infratuzilma muammolarini suratga olib va aniq manzilini ko‘rsatgan holda mobil ilova orqali yuboradi.

Ushbu platforma fuqarolarga o‘z hududidagi real muammolar haqida to‘g‘ridan-to‘g‘ri tegishli tashkilotlarga murojaat qilish imkonini beradi. Masalan, elektr, gaz, suv ta’minotidagi uzilishlar, chiqindilar olib ketilmasligi, yo‘llarning yomon holati, ko‘chadagi yoritish tizimi ishlamayotgani — bularning barchasini portal orqali surat yoki video ilova qilib, aniq manzilini ko‘rsatgan holda mobil ilova orqali yuboradi.

Murojaat yuborilgach, tizim avtomatik tarzda uni mutasaddi tashkilotga yo‘naltiradi. Har bir murojaatga muayyan javob muddati belgilanadi va javoblar portalda ochiq holda e’lon qilinadi. Natijada, aholining murojaati qanday hal etilgani yoki nima sababdan hozircha hal qilinmaganini jamoatchilik kuzatib boradi.

Masalalarning qanchalik tez va sifatli hal etilishiga qarab, hokimlar faoliyati kunlik baholab boriladi.