O‘zbekistonda pay investitsiya fondlarining yagona reyestri ishga tushiriladi

Istiqbolli loyihalar milliy agentligi mamlakatda faoliyat yuritayotgan barcha pay investitsiya fondlari uchun yagona ma’lumotlar bazasini shakllantirish tartibini tasdiqladi. Tegishli buyruq Lex.uz portalida e’lon qilindi.

Yangi tizim O‘zbekiston hududida faoliyat yuritayotgan barcha pay investitsiya fondlarini qamrab oladi. Fond faqat reyestrga kiritilib, bu haqdagi xabar ILMA hamda Qimmatli qog‘ozlar markaziy depozitariysi portallarida joylashtirilganidan keyingina rasman tashkil etilgan deb hisoblanadi. Reyestrga kiritish jarayoni bepul amalga oshiriladi.

Ro‘yxatdan o‘tish uchun ishonchli boshqaruvchi hujjatlar to‘plamini taqdim etishi kerak. Qog‘oz yoki elektron shakldagi hujjatlar tarkibiga ariza, boshqaruvchi kompaniya litsenziyasi nusxasi, fondni tashkil etish haqidagi qaror, pay fondlari bilan tuzilgan boshqaruv shartnomalari hamda investitsiya deklaratsiyasi kiradi.

Arizalarni ko‘rib chiqish uchun davlat organiga yetti ish kuni ajratiladi. Dastlabki besh kun davomida materiallarni Kapital bozorini rivojlantirish departamenti o‘rganadi, so‘ngra agentlik rahbariyati ikki kun ichida yakuniy qaror qabul qiladi. Hujjatlar to‘liq taqdim etilmagan, noto‘g‘ri ma’lumot berilgan yoki qonunchilik talablari buzilgan holatlarda ariza rad etilishi mumkin.

Ijobiy qaror qabul qilinganda, yangi fond haqidagi ma’lumotlar bir ish kuni ichida tizimga joylashtiriladi. Ochiq reyestrda fond nomi, uning faoliyat turi, tashkil etilish maqsadi va aktivlar tarkibi aks etadi. Shuningdek, boshqaruvchi kompaniya haqidagi aloqa ma’lumotlari, STIR, rasmiy sayt va shartnomalar muddati ham ko‘rsatiladi.

Fond faoliyatiga oid ma’lumotlar o‘zgargan taqdirda, boshqaruvchi uch ish kuni ichida regulyatorni xabardor qilishi va tasdiqlovchi hujjatlarni taqdim etishi shart. Ma’lumotlarni yangilash ikki kun davom etadi. Fond yopilganda esa agentlik ikki ish kuni oldin ogohlantiriladi va reyestrdagi yozuv bir sutka ichida bekor qilinadi.