Sanitariya-epidemiologiya xizmati Wendy’sda sanitariya qoidalari buzilgani haqidagi ma’lumotlarni rad etdi

Toshkent shahrida Sanitariya-epidemiologiya xizmati Amerikaning Wendy’s fastfud tarmog‘i filiallaridan birida sanitariya qoidalari buzilgani haqidagi telelavhadagi ma’lumotlarni asossiz deb topdi. Bu haqda idora matbuot xizmati xabar berdi.

Avvalroq Renessans TV telekanali reportaj e’lon qilib, unda SES inspektori poytaxtdagi Wendy’s filiallaridan birida qator qo‘pol qoidabuzarliklar aniqlanganini bildirgan edi. Lavhada xom va tayyor mahsulotlar bir joyda saqlanayotgani, ishlatilgan yog‘ qayta qo‘llanayotgani hamda tozalash vositalari oziq-ovqat mahsulotlari yonida turgani aytilgan. Shuningdek, xodimlar sanitariya xizmatining tuman bo‘limi va Biznes-ombudsman vakillari kelganidan keyingina tozalash ishlarini boshlagani ta’kidlangan.

Franshiza rahbariyati ushbu ayblovlarni qat’iyan rad etib, rasmiy izoh berdi. Kompaniya ma’lumotiga ko‘ra, barcha ingredientlar sanitariya talablariga muvofiq alohida zonalarda saqlanadi. Fritur yog‘i esa sovitish va utilizatsiya qilish uchun maxsus idishlarga quyiladi.

Shuningdek, kompaniya vakillari foydalanilayotgan oshxona uskunalari ifloslangan yog‘da taom tayyorlashga texnik jihatdan yo‘l qo‘ymasligini, tizim avtomatik blokirovka funksiyasiga ega ekanini ma’lum qildi. Maishiy kimyo vositalari esa yopiq shkaflarda saqlanishi qayd etildi.

Tarmoq o‘z pozitsiyasini tasdiqlash uchun laboratoriya sinovlari protokollarini ham taqdim etdi. Burger, naggets, lavash va fri kartoshka namunalarida sanitariya me’yorlariga zid holatlar hamda patogen mikroorganizmlar aniqlanmagani bildirildi. O‘tkazilgan tekshiruv natijalari ham teleefirda aytilgan da’volarni tasdiqlamagan.

Kompaniyaning O‘zbekistondagi bosh direktori Shohrux Jalilov videomurojaat bilan chiqib, vaziyatni brendga qarshi uyushtirilgan bosim sifatida baholadi.

Brendimizga qarshi qandaydir ta’qib ketmoqda — blogerlardan tortib SESgacha, — dedi u.

Shundan so‘ng Sanitariya-epidemiologiya xizmati rasmiy bayonot bilan chiqib, telelavhada keltirilgan ma’lumotlar haqiqatga to‘g‘ri kelmasligini bildirdi.