O‘zbekistonda banklar birinchi chorakda 5,5 trln so‘mdan ortiq foyda oldi

Eng yuqori moliyaviy natijalarni Ipotekabank, NBU va “O‘zsanoatqurilishbank” qayd etdi

2026-yilning dastlabki uch oyi yakuniga ko‘ra, O‘zbekiston tijorat banklari jami 5,5 trln so‘mdan ortiq foyda oldi. Bu haqda Markaziy bank ma’lumotlarida keltirilgan.

O‘tgan yilning mos davriga nisbatan bank sektorining foydasi 61,6% ga oshgan. Mahalliy bozordagi deyarli barcha moliya tashkilotlari chorakni ijobiy natija bilan yakunlagan. Shu bilan birga, banklarning muhim qismi davlat ulushiga ega bo‘lib, rivojlanish instituti sifatida faoliyat yuritadi.

Yagona korporativ axborot portaliga ko‘ra, eng yuqori foyda ko‘rsatkichlari Ipotekabankda — 846,4 mlrd so‘m, NBUda — 603,2 mlrd so‘m, “O‘zsanoatqurilishbank”da — 550 mlrd so‘m va Hamkorbankda — 467,7 mlrd so‘mni tashkil etdi. Shuningdek, yetakchi o‘ntalikka Xalq banki (326 mlrd so‘m), Kapitalbank (324,9 mlrd so‘m), Orient Finans Bank (265,7 mlrd so‘m), Ipak Yo‘li Bank (234,4 mlrd so‘m), Trastbank (232,7 mlrd so‘m) va InfinBank (186,3 mlrd so‘m) kirdi.

Bank tizimidagi umumiy foydaning qariyb 73% i yoki 4,04 trln so‘mi aynan ushbu o‘nta bank hissasiga to‘g‘ri kelgan.

Bundan tashqari, yana yetti bank 100 mlrd so‘mdan 300 mlrd so‘mgacha foyda qayd etdi. Ular qatorida Davr Bank — 183,6 mlrd so‘m, KDB Bank — 180,7 mlrd so‘m, BRB — 156,2 mlrd so‘m, Aloqabank — 117,9 mlrd so‘m, Asia Alliance Bank — 112,2 mlrd so‘m, Octobank — 108,7 mlrd so‘m va Uzum Bank — 105,3 mlrd so‘m bor.

Yana 12 ta bank 10 mlrd so‘mdan 100 mlrd so‘mgacha foyda oldi. Ular orasida TBC Bank — 92,9 mlrd so‘m, Anorbank — 84,1 mlrd so‘m, Universal Bank — 77,8 mlrd so‘m, Apex Bank — 56,4 mlrd so‘m, Asakabank — 46,4 mlrd so‘m, Agrobank — 35,9 mlrd so‘m, Tenge Bank — 33,9 mlrd so‘m, Ziraat Bank — 26,1 mlrd so‘m, Mikrokreditbank — 17,9 mlrd so‘m, Hayot Bank — 14,6 mlrd so‘m, Saderat Bank — 14 mlrd so‘m va Garantbank — 10,8 mlrd so‘m qayd etilgan.

To‘rtta bankning foydasi 10 mlrd so‘mdan kam bo‘ldi. Jumladan, Turonbank — 7,5 mlrd so‘m, Mybank — 2,9 mlrd so‘m, Poytaxt Bank — 2,6 mlrd so‘m va Open Bank — 1,2 mlrd so‘m foyda ko‘rgan.

Hisobot davrida yagona zarar bilan ishlagan bank xususiy AVO Bank bo‘ldi. Bank 2,96 mlrd so‘m zarar qayd etdi.