Ikki venchur kompaniyasi Verifix startapiga $400 ming miqdorida pul ajratdi

2025-yil 30-iyulda Verifix startapi “IT Park Ventures” va “AloqaVentures” bilan investitsiya shartnomasini imzoladi.

Har ikki venchur kompaniya bitim doirasida $400 ming miqdorida mablag‘ ajratadi, bunda “IT Park Ventures” $150 ming, “AloqaVentures” esa $250 ming investitsiya qiladi.

Moliyalashtirish mablag‘lari startapning O‘zbekistonda va undan tashqarida faoliyatini kengaytirish, jamoani kuchaytirish, mahsulotni takomillashtirish, shuningdek, raqamli hujjat aylanishi sohasida korporativ va davlat yechimlari bozorida Verifix’ning o‘rnini mustahkamlashga yo‘naltiriladi.

Verifix — O‘zbekiston qonunchiligiga muvofiq yaratilgan texnologik platforma bo‘lib, u raqamli imzo qo‘yish, hujjatlarni saqlash va boshqarish uchun mo‘ljallangan. Ushbu yechim kompaniyalarga hujjat aylanishini avtomatlashtirish, xarajatlarni kamaytirish va ichki jarayonlarning shaffofligini ta’minlashda yordam beradi.

Bugungi kunda platformadan O‘zbekistondagi 200 dan ortiq yirik kompaniyalar, jumladan banklar, sug‘urta kompaniyalari, logistika operatorlari va savdo tarmoqlari foydalanmoqda. Yaqin kelajakdagi rejalar orasida Markaziy Osiyo va Yaqin Sharq bozorlariga chiqish bor, bunda HoReCa, chakana savdo, distribyutsiya, ishlab chiqarish va xizmat ko‘rsatish sohalariga ustuvorlik beriladi.