2025-yilning birinchi yarmida O‘zbekiston startaplariga $4 mln dan ortiq venchur investitsiya kiritildi

2025-yilning birinchi yarim yilligi yakunlariga ko‘ra, O‘zbekiston startap ekotizimiga kiritilgan venchur investitsiyalari hajmi $4,17 mlnni tashkil etdi. Bu ma’lumot tahlilchi Shahzod Ismatovning investitsiya fondlari haqida tayyorlagan tahlilida keltirilgan.

Eng ko‘p mablag‘ jalb qilgan kompaniyalar:

• IT Park Ventures – $2,21 mln;
• AloqaVentures – $1,445 mln;
• UC Ventures – $450 ming;
• CS Angels – $65 ming.

Yarim yillikdagi eng yirik bitimlar Flexsoft ($1 mln), Datatruck ($550 ming) va Unitlab ($400 ming) kompaniyalariga kiritilgan investitsiyalarni o‘z ichiga oladi. Eng jozibador yo‘nalishlar orasida sun’iy intellekt (Detecting AI, Deepen, Bito), logistika va ERP yechimlari sohasidagi loyihalar mavjud.

Umumiy ko‘rsatkichlar bo‘yicha “AloqaVentures” jamg‘armasi $6 mlndan ortiq sarmoya va 51 ta bitim bilan peshqadamlik qilmoqda. Ularning aksariyati boshlang‘ich bosqichda (g‘oya va pre-seed) amalga oshirilgan. IT Park Ventures esa, aksincha, yetukroq jamoalarga e’tibor qaratmoqda: fond portfelida 8 ta loyiha mavjud bo‘lib, ulardan bittasi o‘sish bosqichida.

O‘zbekiston bozorida venchur investitsiyalarining umumiy hajmi $12,5 mlnga yetib, 90 ta bitimni qamrab oldi. Mablag‘larni jalb qilishning eng faol bosqichlari pre-seed va seed hisoblanadi. Mutaxassislarning ta’kidlashicha, venchur faolligi o‘sishda davom etmoqda, investorlarning e’tibori esa fintech, sun’iy intellekt mahsulotlari va eksportga yo‘naltirilgan yechimlarga qaratilmoqda.