O‘zbekiston va Qirg‘izistonning o‘zaro savdo hajmi $2 mlrdga yetkaziladi

Choʻlponota shahrida O‘zbekiston prezidenti Shavkat Mirziyoyev va Qirg‘iziston prezidenti Sadir Japarov o‘rtasida ikki tomonlama hamkorlikni kengaytirishga bag‘ishlangan muzokaralar bo‘lib o‘tdi. Bu haqda davlat rahbari matbuot xizmati xabar berdi.

Tomonlar strategik sheriklikni yanada chuqurlashtirish istiqbollarini muhokama qildi. Qayd etilishicha, ikki davlat o‘rtasidagi hamkorlik bugungi kunda eng yuqori darajalardan biriga chiqqan.

So‘nggi yillarda o‘zaro savdo hajmi 10 baravarga oshib, o‘tgan yili $1,2 mlrdni tashkil etgan. Hozirda ikki mamlakat ishtirokidagi 450 ta qo‘shma korxona faoliyat yuritmoqda, shuningdek, maxsus Taraqqiyot jamg‘armasi tashkil etilgan. Transport aloqalari doirasida 15 ta muntazam aviaqatnov va 5 ta avtobus yo‘nalishi yo‘lga qo‘yilgan.

Davlat rahbarlari uchrashuvidan avval hukumatlararo komissiyalar, Ishbilarmonlar kengashi yig‘ilishlari va biznes-forumlar o‘tkazildi. Muzokaralar yakunida hukumat idoralari hamda ishbilarmon doiralar o‘rtasidagi doimiy muloqotni davom ettirishga kelishildi. Shuningdek, Davlatlararo kengashni tashkil etish to‘g‘risida qaror qabul qilindi.

Tomonlar BMT, Shanxay hamkorlik tashkiloti va Turkiy davlatlar tashkiloti kabi xalqaro maydonlarda hamkorlikni davom ettirish muhimligini ta’kidladi.

O‘zaro savdo hajmini $2 mlrdga yetkazish maqsadida import o‘rnini bosuvchi loyihalarni kengaytirish hamda ikki mamlakat poytaxtlarida savdo uylari ochish rejalashtirilmoqda.

Sanoat kooperatsiyasi ustuvor yo‘nalish sifatida belgilandi. U energetika, strategik foydali qazilmalarni qazib olish, logistika, to‘qimachilik, qishloq xo‘jaligi va farmatsevtika sohalaridagi qo‘shma loyihalarni qamrab oladi. Yaqinda o‘tkazilgan biznes-forum yakunida qator yangi savdo va investitsiya bitimlari imzolangan.

Energetika strategik hamkorlikning asosiy yo‘nalishlaridan biri sifatida qayd etildi. Prezidentlar “Qambarota GES-1” qurilishini amaliy bosqichga o‘tkazish uchun zarur hujjatlarni imkon qadar tezroq imzolash zarurligini ta’kidladi.

Uchrashuvda “Xitoy – Qirg‘iziston – O‘zbekiston” temir yo‘li qurilishiga tayyorgarlik jarayoni ham muhokama qilindi. Mazkur transport yo‘lagini rivojlantirish maqsadida chegara logistikasini modernizatsiya qilish va yuk tashuvchilar uchun jarayonlarni raqamlashtirish bo‘yicha kelishuvga erishildi.

Hududlar o‘rtasidagi iqtisodiy aloqalarni rivojlantirish maqsadida joriy yil oxirigacha birinchi Hududlar forumi tashkil etiladi. Shuningdek, tomonlar turizm, ta’lim va madaniyat sohalaridagi hamkorlikni davom ettirishga kelishib oldi.

Muzokaralar yakunida Shavkat Mirziyoyev Sadir Japarovni rasmiy tashrif bilan O‘zbekistonga taklif qildi.