Markaziy bank: O‘zbekistonda 10 ga yaqin bank islomiy moliya xizmatlarini yo‘lga qo‘yishni ko‘rib chiqmoqda

O‘zbekistondagi 10 ga yaqin bank islomiy bank faoliyatini yo‘lga qo‘yishga qiziqish bildirmoqda. Markaziy bank tashkilotlarning bunday operatsiyalarni amalga oshirishga tayyorligini hisobga olgan holda litsenziya berish imkoniyatini ko‘rib chiqadi. Bu haqda Markaziy bankning Islom moliyasi bo‘yicha loyiha ofisi ishchi guruhi rahbari Adhamxon Haydarov Kapital.uz muxbiriga ma’lum qildi.

Uning so‘zlariga ko‘ra, regulyator islomiy moliya xizmatlarini ko‘rsatishni rejalashtirayotgan banklar uchun talablarni belgilagan. Agar tashkilot ushbu talablarga javob bersa, litsenziya olishi mumkin. Aks holda, bank hujjatlarini takomillashtirib, qayta ko‘rib chiqish uchun taqdim etishi kerak bo‘ladi.

Hozircha manfaatdor banklarning qanchasi yakunda litsenziya olish uchun ariza topshirishi noma’lum. Haydarovning ta’kidlashicha, har bir moliya muassasasi yangi biznes yo‘nalishini ishga tushirish bo‘yicha qarorni mustaqil qabul qiladi.

Markaziy bank vakilining ma’lumotiga ko‘ra, islomiy moliya xizmatlarini yo‘lga qo‘yishni ko‘rib chiqayotgan 10 ga yaqin mahalliy bank xorijiy investorlar bilan ham hamkorlik qilmoqda. Bu mamlakatga mablag‘ jalb qilish kanallaridan biri bo‘lishi mumkin.

O‘zbekiston 2030-yilgacha islomiy moliya orqali qariyb $1 mlrd jalb qilishni rejalashtirmoqda.

Markaziy bank sukuk chiqarish imkoniyatiga ega bo‘ladi

Islomiy qimmatli qog‘ozlar, jumladan, sukuk chiqarish imkoniyati kapital bozori to‘g‘risidagi yangi qonun loyihasi qabul qilinganidan keyin paydo bo‘ladi. Qonun kuchga kirgach, Markaziy bank ushbu vositalardan bank tizimi likvidligini boshqarishda ham foydalanishi mumkin.

Ungacha regulyator islomiy banklarni tijorat banklariga likvidlik taqdim etish uchun mavjud vositalar orqali qo‘llab-quvvatlashni rejalashtirmoqda.

Islomiy moliya bo‘yicha alohida qonun qabul qilish rejalashtirilmagan

O‘zbekistonda islomiy bank faoliyatini joriy etish uchun Fuqarolik va Soliq kodekslariga, shuningdek, bank faoliyatini tartibga soluvchi yettita qonunga o‘zgartirish va qo‘shimchalar kiritilgan.

Haydarovning so‘zlariga ko‘ra, ushbu o‘zgartirishlar islomiy bank operatsiyalarini amalga oshirish uchun yetarli. Shu sababli islomiy moliya bo‘yicha alohida kompleks qonun qabul qilish zarurati mavjud emas.

Uning qayd etishicha, bunday hujjat qabul qilinishi amaldagi qonunchilikka yana qayta o‘zgartirishlar kiritishni talab qilgan bo‘lardi.