“UzBAT” kompaniyasidagi 2,6% lik davlat ulushi sotildi

“Toshkent” fond birjasida “UzBAT” kompaniyasining ustav kapitalining 2,6% ulushiga teng aksiyalar paketi sotildi. Bu haqda birja matbuot xizmati xabar berdi.

6-oktabr kuni “Toshkent” fond birjasi maydonchasida 641 mingdan ortiq qimmatli qog‘ozlar bilan tranzaksiya amalga oshirildi, bu kompaniya ustav kapitalining 2,6% ini tashkil etadi. Aksiyalar har biri 420 ming so‘mdan sotilgan. Natijada, bitimning umumiy qiymati 269,8 mlrd so‘mni ($22,2 mln) tashkil etdi.

2024-yilning to‘qqiz oyi yakunlariga ko‘ra, kompaniyaning sof foydasi 1,07 trln so‘mga yetib, 45,2% ga oshgan. Tushum 2,63 trln so‘mni tashkil etgan bo‘lsa, realizatsiya qilingan mahsulot tannarxi 980,7 mlrd so‘m (27,8% o‘sish) miqdorida qayd etilgan. Umumiy foyda esa 25% ga oshib, 1,65 trln so‘mni tashkil etdi.

Joriy yilning iyul oyida “UzBAT” aksiyadorlari 929,21 mlrd so‘m miqdorida dividend olgan, bu har bir aksiya uchun 37,7 ming so‘mdan to‘g‘ri keladi. Avgust oyi oxiriga kelib, ushbu summaning 568,58 mlrd so‘mi yoki 61,2% qismi to‘lab berilgan.

Bitim narxini inobatga olgan holda, “UzBAT” kompaniyasining bozor kapitallashuvi taxminan 10,36 trln so‘mga baholangan, bu esa taxminan $855 mlga to‘g‘ri keladi