UC Ventures Osnova startapiga $100 minglik investitsiya kiritdi

Ta’lim sohasidagi Osnova startapi seed (boshlang‘ich) bosqichida $100 ming investitsiya jalb qildi. Mablag‘ni mamlakatdagi yetakchi venchur fondlardan biri — UC Ventures ajratgan.

Bitim bo‘yicha maslahatchi sifatida Gafurov, Kardash & Partners (GK&P) kompaniyasi ishtirok etdi. Platforma bu mablag‘ni masshtabni kengaytirish, yangi kurslar yaratish hamda ta’lim jarayoniga sun’iy intellektni joriy etish uchun yo‘naltirishni rejalashtirmoqda.

Osnova — kasbiy ta’limga ixtisoslashgan platforma bo‘lib, 2024-yil yozida ishga tushirilgan. U kasbiy yo‘nalishni aniqlovchi testlar, shuningdek marketing, HR, raqamli ko‘nikmalar va boshqa yo‘nalishlardagi kurslarni o‘zbek va rus tillarida taklif etadi. Servisda hozirda 80 mingdan ortiq foydalanuvchi mavjud.

Platformaning hammuassislari — Alisher Jumaniyozov, Kamila Uzakova va Anton Chexov — 2025-yil iyun oyida Spot’ga bergan intervyusida ilgari qanday qilib onlayn kurslarni ishga tushirishga uringanliklari, ish beruvchilar uchun mos xodim topish nega qiyinligi va hamkorlikdagi integratsiyalar bir foydalanuvchini jalb etish xarajatini qanday kamaytirgani haqida so‘zlab berishgan.