O‘zbekiston va Turkmaniston chegaraoldi hududlarda vizasiz rejimni tiklash masalasini muhokama qildi
Tomonlar, shuningdek, Toshkent — Ashxobod yo‘nalishida muntazam aviaqatnovlarni yo‘lga qo‘yish va xalqaro yuk tashishni soddalashtirishi mumkin
O‘zbekiston tashqi ishlar vaziri o‘rinbosari Olimjon Abdullayev Turkmanistonning mamlakatdagi elchisi Shadurdi Meredov bilan uchrashdi. Bu haqda O‘zbekiston Tashqi ishlar vazirligi xabar berdi.
Muzokaralarda asosiy masalalardan biri chegaraoldi hududlar aholisi uchun uch sutkagacha vizasiz harakatlanish tartibini qayta tiklash bo‘ldi. Bunday imkoniyat 2004-yilda imzolangan hukumatlararo bitimda nazarda tutilgan.
Shuningdek, tomonlar Toshkent — Ashxobod — Toshkent yo‘nalishida muntazam aviaqatnovlarni tashkil etish, xalqaro yuk tashish tartiblarini soddalashtirish va davlat chegarasidagi o‘tkazish punktlari faoliyatini takomillashtirish masalalarini muhokama qildi.
Konsullik sohasidagi hamkorlik, jumladan, ikki mamlakat fuqarolarining huquqlarini himoya qilish va tegishli idoralar o‘rtasida axborot almashish masalalariga ham e’tibor qaratildi.
Uchrashuv yakunida muhokama qilingan masalalarni tegishli idoralar bilan birgalikda ishlab chiqish va hamkorlikni davom ettirishga kelishib olindi.
Moliya va biznes haqida ko'proq yangiliklar Telegram kanalda @KPTLUZ