O‘zbekistonda foydalanilmayotgan aerodromlar tadbirkorlarga turizmni rivojlantirish uchun ijaraga beriladi

O‘zbekistonda faol dam olish turizmini rivojlantirish maqsadida foydalanilmayotgan aerodromlarni xususiy sektorga ijaraga berish rejalashtirilmoqda. Bu haqda Turizm qo‘mitasi tomonidan ishlab chiqilgan qaror loyihasida ma’lum qilingan.

Hujjatda kichik aviatsiyani joriy etish va rivojlantirish nazarda tutilgan. Ushbu yo‘nalishdagi regulyator Transport vazirligi huzuridagi Fuqaro aviatsiyasi agentligi (“O‘zaviatsiya”) bo‘ladi. Agentlikka oltita qo‘shimcha vakolat berilishi rejalashtirilgan. Jumladan, havo kemalarini hisobga olish, sertifikatlar berish, texnik qo‘llab-quvvatlash, kadrlar tayyorlash va parvozlar xavfsizligini nazorat qilish shular jumlasidandir.

Agentlik Xalqaro fuqaro aviatsiyasi tashkiloti (ICAO) standartlariga mos ravishda yengil havo transportidan foydalanish bo‘yicha alohida me’yorlarni ishlab chiqadi. Ushbu talablar maksimal uchish og‘irligi 5,7 ming kilogrammgacha bo‘lgan samolyotlar hamda og‘irligi 2,2 ming kilogrammgacha bo‘lgan vertolyotlarni qamrab oladi.

Transport vazirligiga uch oy ichida kichik uchish apparatlarini hisobga olish, sertifikatlash va texnik nazoratdan o‘tkazishning soddalashtirilgan tartibini ishlab chiqish topshirilgan. Shuningdek, olti oy davomida ICAOning Rim konvensiyasi tamoyillari asosida uchinchi shaxslar oldidagi fuqarolik javobgarligini majburiy sug‘urtalashni tartibga soluvchi qonun loyihasi tayyorlanishi rejalashtirilmoqda.

Tasdiqlanishi rejalashtirilgan chora-tadbirlar rejasiga ko‘ra, og‘irligi 115 kilogrammdan kam bo‘lgan uchish apparatlari uchun majburiy hisobga olish talabi bekor qilinadi hamda “Havaskor aviatsiya” alohida toifasi joriy etiladi.

Havo hududidan foydalanish qoidalariga ham yangi zonalar — U-space (shaharlarda uchuvchisiz apparatlar harakatini boshqarish), G-space va W-space kiritiladi.

Kadrlar zaxirasini shakllantirish maqsadida Cadet Program ta’lim tashabbusi yo‘lga qo‘yiladi, “O‘zaviatsiya” esa yagona “Kichik aviatsiya” elektron tizimini joriy etadi.

Loyihadagi asosiy yo‘nalishlardan biri foydalanilmayotgan hududiy uchish-qo‘nish yo‘laklarini rekonstruksiya qilish hisoblanadi. Ular qayta tiklanganidan so‘ng tadbirkorlarga tashabbuskor loyihalarni amalga oshirish uchun ijaraga beriladi. Shuningdek, xususiy sektor va nodavlat tashkilotlar turizm sohasida o‘quv mashg‘ulotlarini tashkil etish uchun binolarni ijaraga olish imkoniyatiga ega bo‘ladi.