O‘zbekiston sentabr oyida oltin xarid qilgan eng yirik uchta mamlakat qatoridan joy oldi

2026-yil sentabr oyida O‘zbekiston Markaziy banki 7 tonna oltin xarid qildi. Natijada mamlakat dunyo markaziy banklari orasida oltin xarid qilish hajmi bo‘yicha uchinchi o‘rinni egalladi. Bu haqda Jahon oltin kengashining (WGC) ma’lumotlarida keltirilgan.

Oy davomida O‘zbekistondan ko‘proq oltin faqat Polsha (25 tonna) va Xitoy (23 tonna) tomonidan xarid qilingan. Umuman olganda, sentabr oyida dunyo markaziy banklari jami 61 tonna oltin sotib oldi. Bu 2026-yil boshidan buyon qayd etilgan eng yuqori oylik ko‘rsatkich hisoblanadi.

Sentabr oyida oltin xarid qilgan boshqa mamlakatlar qatorida Qozog‘iston (+5 tonna), Iordaniya (+4 tonna), Chexiya (+2 tonna) va Boliviya (+1 tonna) ham bor. Eng yirik sotuvchi esa oltin zaxiralarini 6 tonnaga kamaytirgan Rossiya bo‘ldi.

Yil boshidan buyon dunyo markaziy banklarining sof oltin xaridlari 228 tonnani tashkil etdi. Bu o‘tgan yilning mos davridagi ko‘rsatkichdan 7 foizga kam.