Humo to‘lov tizimi faoliyatida tungi uzilishlar kutilmoqda
Cheklovlar 5-iyundan 6-iyunga o‘tar kechasi sakkiz soat davom etadi va butun mamlakat bo‘ylab tranzaksiyalar amalga oshirilishiga ta’sir qilishi mumkin
Фото: Абдумавлон Мадмусаев / Kapital.uz
O‘zbekistonda 5-iyun soat 23:00 dan 6-iyun soat 07:00 gacha Humo bank kartalariga xizmat ko‘rsatishda qisqa muddatli uzilishlar kuzatilishi mumkin. Bu haqda to‘lov tashkiloti matbuot xizmati ma’lum qildi.
Vaqtinchalik noqulayliklarga Markaziy bankning Banklararo telekommunikatsiya tarmog‘ida rejalashtirilgan profilaktika ishlari sabab bo‘ladi. Kompaniya vakillari fuqarolarga ushbu jadvalni inobatga olib, zarur moliyaviy operatsiyalarni oldindan yakunlashni tavsiya qildi.
Uzcard’da ta’kidlanishicha, ularning infratuzilmasi odatdagi tartibda ishlashda davom etadi. Biroq texnik ishlar davomida Uzcard bankomatlari vaqtincha Humo kartalariga xizmat ko‘rsatmasligi mumkin.
Uzcard tizimining navbatdagi profilaktika ishlari 8-iyun kuni soat 02:00 dan 02:30 gacha o‘tkaziladi. Ushbu vaqt oralig‘ida ham terminallar ulanishida hamda kobeyjing kartalarining xorijdagi ishlashida qisqa muddatli kechikishlar kuzatilishi kutilmoqda.
Ulashish:
Moliya va biznes haqida ko'proq yangiliklar Telegram kanalda @KPTLUZ
