Xorazmda Urganch va Xiva o‘rtasida yangi trolleybuslar qatnovi yo‘lga qo‘yiladi

Yangi trolleybuslar harakati oralig‘i avvalgi 25 daqiqadan 12 daqiqagacha qisqaradi

27-oktyabrdan Urganch — Xiva yo‘nalishida yangi trolleybuslar qatnay boshlaydi. Shuningdek, Urganch shahrida trolleybuslarga xizmat ko‘rsatish uchun yangi trolleybus saroyi binosi foydalanishga topshirildi.

Yangi trolleybuslar Urganch xalqaro aeroporti, Urganch temiryo‘l vokzali va Xiva temiryo‘l vokzalini bog‘lovchi yo‘nalishda harakatlanadi. Yo‘lovchi tashish xizmatlarini yalpi shartnomalar (brutto-kontraktlar) tizimi asosida tashkil etish rejalashtirilgan. Bunda tashuvchiga to‘lov sotilgan chiptalar soniga emas, balki bajarilgan transport ishiga qarab belgilanadi.

Harakat tarkibi yangilanishi natijasida Urganch va Xiva o‘rtasida trolleybuslar qatnovi oralig‘i 25 daqiqadan 12 daqiqagacha qisqarishi kutilmoqda.

25-oktyabr kuni Xorazm Trolleybus Saroyi davlat muassasasining yangi binosi ochildi.