Mirziyoyev Markaziy Osiyo uchun “Toza havo” konsorsiumini tuzishni taklif qildi

Prezident Shavkat Mirziyoyev Ostanada o‘tkazilgan mintaqaviy ekologik sammitda iqlim o‘zgarishiga qarshi kurash bo‘yicha sakkizta muhim tashabbusni ilgari surdi. Bu haqda davlat rahbari matbuot xizmati xabar berdi.

Nutq davomida Markaziy Osiyoda harorat global ko‘rsatkichlarga nisbatan ikki baravar tez oshayotgani ta’kidlandi. Hozirga qadar muzliklarning qariyb uchdan bir qismi yo‘qolgan, suv resurslari tanqisligi kuchaygan va 80 mln gektar yer degradatsiyaga uchragan.

Davlat rahbari mamlakatda iqlim o‘zgarishlariga moslashish bo‘yicha amalga oshirilayotgan ishlarni ham sanab o‘tdi. Jumladan, 1 mlrd tup daraxt va buta ekilgan, Orol dengizi qurigan tubida 2 mln gektardan ortiq hududda o‘rmonzorlar barpo etilgan. Suvni tejash texnologiyalari hisobiga yiliga 10 mlrd kub metr suv iqtisod qilinmoqda.

Shuningdek, qayta tiklanuvchi energiya ulushi 30% ga yetgan bo‘lib, uni o‘n yillik oxirigacha 50% dan oshirish rejalashtirilgan. O‘zbekiston issiqxona gazlari chiqindilarini 35% ga kamaytirish bo‘yicha majburiyatlarini muddatidan oldin bajargan va 2035-yilgacha bu ko‘rsatkichni ikki baravar qisqartirishni maqsad qilgan.

Sammitda ilgari surilgan tashabbuslar qatorida Markaziy Osiyo uchun “Toza havo” konsorsiumini tashkil etish taklifi ham bor. Ushbu tuzilma atmosfera havosi sifatini nazorat qilish va sanoatni modernizatsiya qilish uchun moliyaviy resurslarni jalb etishga xizmat qiladi.

Bundan tashqari, cho‘llanishga qarshi kurash markaziga mintaqaviy maqom berish, “yashil” savdo koridorini joriy etish, yagona iqlim investitsiya portfelini shakllantirish va atrof-muhit o‘zgarishlari atlasini ishlab chiqish taklif qilindi.

Shuningdek, 2027-yilda O‘zbekistonda Jahon yoshlar iqlim forumi o‘tkazilishi, hamda joriy yilda Samarqandda bo‘lib o‘tadigan Global ekologik fond assambleyasi va suvni tejash bo‘yicha forumlarda mintaqa davlatlarining birgalikda ishtiroki ta’kidlandi.