Toshkentda 24 soatli ko‘chalar va Bo‘zsuv bo‘yida saylgoh barpo etiladi

Toshkentda 24 soatli yangi ko‘chalar yaratish va Bo‘zsuv kanalini obodonlashtirish rejalashtirilmoqda. Bu haqda Toshkent shahri hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Baxtiyor Haydarov xalq deputatlari kengashining 23-sentabr kuni bo‘lib o‘tgan yig‘ilishida ma’lum qildi.

Avvalroq Toshkent shahri bo‘yicha jami 26 ta ko‘cha tanlab olingandi. Ushbu tashabbusning davomi sifatida Sergeli tumanidagi Yangi Sergeli ko‘chasining 3,5 kilometr qismini 24/7 rejimda ishlaydigan turizm ko‘chasiga aylantirish loyihasi ishlab chiqildi.

Haydarovning so‘zlariga ko‘ra, mazkur loyihani amalga oshirish uchun respublika budjetidan 8,7 mlrd so‘m yo‘naltiriladi.

Shu bilan birga, Chilonzor tumanidagi Qatortol ko‘chasining 1 kilometrini 24 soatlik ko‘chaga aylantirish loyihasi taklif qilinmoqda. Ushbu loyihaga respublika budjetidan 10,2 mlrd so‘m ajratiladi, — deya qo‘shimcha qildi u.

Bundan tashqari, Haydarov Bo‘zsuv kanalining bir qismi allaqachon obodonlashtirilganini eslatdi.

Lekin kanalning boshqa tomoni — Yunusobod tumanida joylashgan yana bir qismida bir-ikki yildan buyon qurilish nihoyasiga yetmayotgandi. Oxirgi, beshinchi loyihamiz tumandagi Minor, Matonat va Qashqar mahallalari hududidan o‘tuvchi Bo‘zsuv kanali bo‘ylab saylgoh tashkil etish loyihasi hisoblanadi, — dedi u.

Poytaxt hokimining birinchi o‘rinbosari, shuningdek, shahardagi eng katta yerosti yo‘li — “Toshkent” metro bekati va Shimoliy temiryo‘l vokzali o‘rtasidagi maydonda savdo va xizmat ko‘rsatish shoxobchalarini tashkil qilish rejalarini ham ma’lum qildi.