Toshkent aeroportidagi avtoturargohlarni ijaraga berish boshlandi

“Uzbekistan Airports” kompaniyasi Toshkent xalqaro aeroporti hududidagi avtoturargohlarni ijaraga berish bo‘yicha lotni E-auksion.uz platformasiga joylashtirdi.

Gap umumiy maydoni 40 ming kvadrat metrdan ortiq bo‘lgan va qariyb 1,5 ming avtomobilga mo‘ljallangan oltita avtoturargoh (P1, P3, P4, P5, P7, P8) haqida bormoqda. Ular 3 yil muddatga ijaraga berilib, operator zimmasiga infratuzilmani rivojlantirish majburiyati yuklanadi.

Loyiha doirasida hududda raqamli navigatsiya, bo‘sh joylarni ko‘rsatuvchi tablolar, qo‘shimcha to‘lov usullari hamda elektromobillar uchun quvvatlash stansiyalarini joriy etish rejalashtirilgan. Operator turargohlarni 24/7 ishlatish, xizmat ko‘rsatish, qo‘riqlash, shuningdek, rekonstruksiya va obodonlashtirish ishlariga investitsiya kiritishi kerak bo‘ladi.

Ijara haqi qat’iy (auksionda belgilanadigan) va o‘zgaruvchan — tushumdan 5% lik qismdan iborat bo‘ladi. Bunda operator hisobotlarni taqdim etish va hisob yuritish tizimlariga kirishni ta’minlash orqali ish jarayonining shaffofligini kafolatlashi shart.

Ijara to‘lovi qat’iy va o‘zgaruvchan qismlardan iborat bo‘ladi: auksionda aniqlanadigan asosiy summa hamda tushumning 5 foizi. Operator faoliyatning shaffofligini ta’minlash uchun hisobot va hisob tizimlariga kirish imkonini ham taqdim etadi.

Lotning boshlang‘ich narxi yiliga 48,78 mlrd so‘m etib belgilangan. Auksion 2026-yil 19-may kuni o‘tkazilishi rejalashtirilgan.