“Uzbekistan Airways” Toshkent — Tel-Aviv reyslarini qayta tikladi

Uzbekistan Airways Toshkent va Tel-Aviv o‘rtasidagi muntazam aviaqatnovlarni qayta tikladi. Bu haqda O‘zbekistonning Isroildagi elchixonasi matbuot xizmati ma’lum qildi.

Tanaffusdan keyingi ilk parvoz 14-aprel kuni amalga oshirildi. Hozirda aviakompaniya haftasiga uch marta reyslarni bajarmoqda, may oyidan esa parvozlar soni oshiriladi.

Parvozlar jadvali:

• Dushanba va payshanba — Toshkentdan 8:05 (8:10), Tel-Avivdan 13:35 (12:35);
• Seshanba — Toshkentdan 15:15, Tel-Avivdan Samarqand orqali 20:15;
• Yakshanba (3-maydan boshlab) — Toshkent — Samarqand — Tel-Aviv — Toshkent yo‘nalishi.

Mazkur yo‘nalish bo‘yicha parvozlar mart oyida mintaqadagi vaziyat keskinlashgani sabab Isroil havo hududi yopilgani tufayli vaqtincha to‘xtatilgan edi. Shu davrda yo‘lovchilarga chiptalarni qo‘shimcha to‘lovsiz boshqa sanalarga almashtirish imkoniyati berilgan.