2025-yilda Toshkentga mingta yangi avtobus olib kelinadi

1-fevralga qadar jamoat transportini rivojlantirish to‘g‘risidagi qonun loyihasini tayyorlash va alohida dasturni qabul qilish rejalashtirilmoqda

2025-yilda Toshkentga mingta yangi avtobus olib kelinadi. Bu haqda transport vaziri Ilhom Mahkamov “O‘zbekiston 24” telekanaliga bergan intervyusida ma’lum qildi.

Shuningdek, vazir 675 ta yangi infokioskni o‘rnatish rejalashtirilganini aytib o‘tdi. Ushbu kiosklar orqali yo‘lovchilar avtobuslarda foydalanish uchun QR-kodli bir martalik chiptalarni xarid qilish imkoniyatiga ega bo‘ladi.

Mahkamovning so‘zlariga ko‘ra, 1-fevralga qadar Toshkentda jamoat transportini rivojlantirish bo‘yicha qonun loyihasi ishlab chiqilib, alohida dastur qabul qilinishi ko‘zda tutilgan.

Ayni paytda shaharda 5100 ta infokiosk faoliyat yuritmoqda, shundan 769 tasi avtobus bekatlarida joylashgan.