Fransiyaga qisqa muddatli viza olish tartibi o‘zgaradi

Toshkentdagi Fransiya vizalari markazida 2026-yil 1-iyuldan boshlab 90 kungacha bo‘lgan qisqa muddatli turistik vizalarni rasmiylashtirish tartibi o‘zgaradi. Bu haqda TLScontact kompaniyasi matbuot xizmati ma’lum qildi.

Yangi tartibga ko‘ra, arizachilar endilikda qabul sanasi va vaqtini mustaqil tanlamaydi. Tizim mavjud bo‘sh o‘rinlardan kelib chiqib, tashrif vaqtini avtomatik ravishda belgilaydi.

Mazkur o‘zgarish faqat turistik vizalar uchun amal qiladi. Boshqa toifadagi vizalarni rasmiylashtirish tartibi esa o‘zgarishsiz qoladi.

Viza olish uchun fuqarolar avvalo TLScontact’ning rasmiy portalida shaxsiy akkaunt yaratib, arizani to‘ldirishi kerak. Ma’lumotlar tekshirilgach, ariza elektron navbatga qo‘yiladi.

Shundan so‘ng foydalanuvchining elektron pochtasiga qabul sanasi va vaqti ko‘rsatilgan xabarnoma yuboriladi. Arizachiga xizmat haqini to‘lash va bronni tasdiqlash uchun 24 soat vaqt beriladi.

Kompaniya ma’lumotiga ko‘ra, yangi tizim pulli vositachilar faoliyati va navbatlarni sun’iy band qilish holatlarining oldini olish, shuningdek, barcha arizachilar uchun teng sharoit yaratishga qaratilgan.

Avvalroq ijtimoiy tarmoqlarda foydalanuvchilar ushbu viza markazi orqali bo‘sh qabul sanalarini topish qiyinligi yuzasidan bir necha bor shikoyat qilgan edi.