O‘zbekistonda to‘lanmagan jarimalar uchun avtomobillar jarima maydonchasiga joylashtirilishi mumkin

O‘zbekistonda yo‘l harakati qoidalarini buzganlik uchun ma’muriy ishlarni rasmiylashtirish va ko‘rib chiqishning yangi tartibi tasdiqlandi. Bu haqda Lex.uz’da e’lon qilingan hujjatda ma’lum qilindi.

Ichki ishlar vazirining 2026-yil 5-noyabrdagi buyrug‘i bilan tasdiqlangan yo‘riqnoma 2011-yildan buyon amal qilib kelgan tartibni almashtiradi.

Yangi qoidalarga ko‘ra, yo‘l harakati qoidasi buzilgan joyning o‘zida inspektorlar planshet orqali «Ma’muriy amaliyot» moduli yordamida bayonnoma rasmiylashtiradi. Haydovchining shaxsi biometrik ma’lumotlar orqali aniqlanadi, hujjat esa elektron imzo yoki barmoq izi bilan tasdiqlanadi.

Qog‘oz shaklidagi bayonnomalarni faqat ayrim holatlarda, masalan, haydovchi aybini tan olmaganida yoki hodisa joyida internet aloqasi bo‘lmaganida rasmiylashtirishga ruxsat etiladi. Shu bilan birga, qoidabuzarlik sodir etilgan joyning o‘zida jarima to‘lashni talab qilish yoki pul qabul qilish taqiqlanadi.

Ma’muriy ish 15 kun ichida ko‘rib chiqilishi kerak. Ishni ko‘rib chiqish joyi va vaqti haqidagi ma’lumotlar Yagona interaktiv davlat xizmatlari portalidagi (YIDXP) shaxsiy kabinet yoki mobil ilova orqali yuboriladi.

Qaror ustidan yuqori turuvchi organga yoki sudga 10 kun ichida shikoyat qilish mumkin.

To‘lanmagan jarima uchun qanday choralar ko‘riladi?

Jarimani to‘lash uchun 60 kun muddat beriladi. Ushbu muddat ichida qarzdorlik bartaraf etilmasa, avtomobil haqidagi ma’lumotlar ichki ishlar organlari xodimlarining planshetlarida aks etadi.

Bunday holatda inspektorlar alohida bayonnoma tuzmasdan avtomobilni jarima maydonchasiga joylashtirishi mumkin. Buning oldini olish uchun haydovchi jarimani joyida to‘lashi kerak bo‘ladi.

Jarima ballari qanday hisoblanadi?

Yo‘riqnomada videokuzatuv kameralari orqali qayd etilgan qoidabuzarliklar uchun javobgarlikka tortish tartibi ham belgilangan. Bunday holatlarda javobgarlik avtomobil egasiga yuklanadi, bunda qoidabuzarlikning takroriyligi hisobga olinmaydi.

Agar qoidabuzarlik haqidagi ma’lumotlar qayd etilganidan keyin 48 soatdan kechikib vakolatli markazga kelib tushsa, ma’muriy ish tugatilishi lozim.

Yo‘l harakati qoidalarining ayrim buzilishlari uchun haydovchilarga ikki ballgacha jarima ballari hisoblanadi. Ular bir yil o‘tgach bekor qilinadi. Agar haydovchi shu muddat davomida 12 balldan ortiq ball to‘plasa, qo‘shimcha jazo qo‘llash masalasini hal qilish uchun ish materiallari avtomatik ravishda sudga yuboriladi.

Yangi yo‘riqnoma 2027-yil 7-yanvardan kuchga kiradi.