Toshkent markazidagi “Brodvey” va unga tutash hududlar yangilanadi

Toshkent shahri hokimligi Sayilgoh ko‘chasi, skver va ularga tutash piyodalar hududlarini obodonlashtirish bo‘yicha tizimli ishlarni boshladi. Bu haqda poytaxt ma’muriyati matbuot xizmati xabar berdi.

Mutaxassislar hududning hozirgi holatini tahlil qilib, infratuzilmani kompleks yangilash zarurligini aniqlagan. Loyiha yagona dizayn-kod tamoyillari asosida ishlab chiqiladi va uni tayyorlashda shahar aholisi hamda ekspertlar hamjamiyati takliflari inobatga olinadi.

Hokimlik hudud ochiq jamoat makoni maqomini saqlab qolishini ta’kidladi. Ko‘cha rassomlari va boshqa ijodkorlar o‘z faoliyatini davom ettiradi, chunki loyiha “jonli” muhitni cheklashga emas, balki xavfsizlik va qulaylikni ta’minlash maqsadida uni tartibga solishga qaratilgan.

Rekonstruksiya ishlari eskirgan qoplamalar va piyodalar uchun noqulay yo‘laklar sababli amalga oshiriladi. Shuningdek, hududdagi vizual ko‘rinish hamda savdo faoliyati sanitariya va shaharsozlik me’yorlariga moslashtiriladi.

Rejalashtirilgan ishlar ro‘yxati quyidagilarni o‘z ichiga oladi:

• yo‘l va trotuar qoplamalarini almashtirish;
• piyodalar yo‘laklari va kirish qismlarini optimallashtirish;
• to‘siqsiz muhit yaratish;
• “Brodvey”, skver va tutash hududlarni obodonlashtirish;
• yoritish tizimini yangilash;
• sug‘orish va ko‘kalamzorlashtirish tizimini rivojlantirish;
• yangi o‘rindiqlar, chiqindi qutilari va boshqa kichik arxitektura shakllarini o‘rnatish;
• favvoralarni ta’mirlash;
• reklama va peshlavhalarni yagona dizayn-kod standartlariga moslashtirish;
• noqonuniy konstruksiyalarni demontaj qilish;
• savdo nuqtalarini belgilangan qoidalar asosida tashkil etish;
• videokuzatuv kameralarini va monitoring tizimlarini o‘rnatish.

Hududdagi mavjud daraxtlar mutaxassislar tomonidan tekshiruvdan o‘tkaziladi. Bundan tashqari, mazkur hududga kamida mingta yangi ko‘chat, jumladan butalar va manzarali o‘simliklar ekiladi.