O‘zbekistonda to‘rtta yo‘nalish bo‘yicha yuqori tezlikdagi temiryo‘l tarmog‘i rivojlantiriladi

O‘zbekiston mamlakatning barcha to‘rtta yo‘nalishi bo‘yicha yuqori tezlikdagi yo‘nalishlarni rivojlantirishni rejalashtirmoqda. Bu haqda 5-may kuni Samarqandda bo‘lib o‘tgan Osiyo taraqqiyot banki yig‘ilishi doirasidagi panel sessiyasida transport vaziri o‘rinbosari Jasurbek Choriyev ma’lum qildi, deb xabar bermoqda Gazeta nashri.

Uning so‘zlariga ko‘ra, O‘zbekistonda standart temiryo‘l infratuzilmasining uzunligi taxminan 8 ming kilometrni tashkil etadi.

Vazir o‘rinbosari Toshkent — Xiva yo‘nalishida Jaloliddin Manguberdi yangi Hyundai Rotem tezyurar poyezdi yo‘lga qo‘yilganini alohida ta’kidladi.

Menimcha, bu respublikamiz uchun ulkan yutuq. Chunki Xiva temir yo‘l qatnoviga uzoq vaqtdan beri ehtiyoj sezib kelgan turistik markazlar orasidagi yagona yetishmayotgan nuqta edi, — dedi Transport vazirligi rahbari o‘rinbosari.

U yangi yo‘nalish sayyohlik imkoniyatlarini yaxshilashi va turistik markazlardagi mavjud infratuzilmaning samaradorligini oshirishini ta’kidladi.

Sayohat vaqti deyarli ikki baravar qisqartirildi — endi sayohat 13 yarim soat o‘rniga taxminan 7 soat 30 daqiqa davom etadi. Bu katta yutuq, — dedi Jasurbek Choriyev.

Vazir o‘rinbosarining so‘zlariga ko‘ra, O‘zbekiston yuqori tezlikdagi poyezdlar parkini ham kengaytirmoqda: oltita yangi Hyundai Rotem poyezdlariga buyurtma berilgan, ulardan ikkitasi allaqachon yetib kelgan.

Bundan tashqari, mamlakatning sharqi va janubida yangi temiryo‘l liniyalari qurilmoqda. Bular, shuningdek, O‘zbekiston 2030-yilgacha strategik rivojlanish dasturiga kiritilgan yuqori tezlikdagi temiryo‘l loyihalari bo‘lib, unda mamlakatning barcha to‘rtta yo‘nalishida yuqori tezlikdagi temiryo‘l tarmog‘ini yaratish ko‘zda tutilgan, — dedi transport vaziri o‘rinbosari.

“O‘zbekiston 2030” strategiyasi doirasida mamlakat transport xizmatlari hajmini 188 trln so‘mdan 320 trln so‘mgacha, mamlakat orqali tranzit yuk tashish hajmini 15,2 mlndan 18,5 mln tonnagacha va havo yo‘lovchilari sonini 15 mlndan 24 mlgacha oshirishni rejalashtirmoqda. Ushbu maqsadlar O‘zbekistonning global transport va logistika tarmoqlariga integratsiyasini chuqurlashtirish va milliy transport tizimining salohiyatini oshirishga qaratilgan.

Temiryo‘l sohasida Samarqand va Qoraqalpog‘iston o‘rtasidagi yuk tashish vaqtini 2030-yilga kelib 10 kundan 6 kungacha qisqartirish rejalashtirilgan. Elektrlashtirilgan temir yo‘llarning ulushi 2025-yildagi 51% dan 2030-yilda 65% gacha oshishi kutilmoqda. Yuqori tezlikdagi poyezdlarda tashiladigan yo‘lovchilar sonini 1,3 mlndan 3,25 mlngacha oshirish rejalashtirilgan.