Raqobat qo‘mitasi yonilg‘i quyish shoxobchalarida 22 mln so‘m noto‘g‘ri hisoblanganini aniqladi

Raqobat qo‘mitasi tomonidan hududlarda faoliyat ko‘rsatayotgan avtomobillarga yonilg‘i quyish shoxobchalarida (AYOQSH) sotilayotgan avtobenzin yuzasidan nazorat tadbiri  o‘tkazildi. 

Toshkent viloyatida faoliyat olib boruvchi “BLACK GOLD ENERGY” MCHJ (AI-92 hamda AI-95 markali) hamda “SAFOMAX OIL” MCHJ (AI-92 markali)larda sotilayotgan yuqori oktanli avtobenzinlardan olingan namunalarning sifat tahlil natijalari davlat standarti talablariga mos emasligi aniqlandi.

Samarqand viloyati Jomboy tumanida joylashgan “HAPPY OIL” MCHJga qarashli AYOQSHda sotilayotgan AI-95 markali avtobenzin yoqilg‘isidan olingan namunalari Toshkent markaziy nazorat-kimyo laboratoriyasida tekshirilganda, mazkur  markali avtobenzin sifatsiz ekanligi aniqlangan.

Yuqoridagi aniqlangan holatlarga muvofiq, “Iste’molchilarning huquqlarini himoya qilish to‘g‘risida”gi Qonun talablari buzilishi alomatlari bilan 3 ta xo‘jalik yurituvchi subyektga nisbatan ish qo‘zg‘atilib, jami 22 mln so‘mga yaqin pul mablag‘larini iste’molchilarga qayta hisob-kitob qilish to‘g‘risida bajarilishi majburiy bo‘lgan ko‘rsatmalar berildi.