Rossiyadan O‘zbekistonga kelayotgan turistlar oqimi 30% dan ko‘proqqa oshdi

2026-yilning yanvar–may oylarida Rossiyadan O‘zbekistonga kelgan turistlar soni o‘tgan yilning mos davriga nisbatan 30% dan ko‘proqqa oshdi. Bu haqda Turizm qo‘mitasi ma’lumotlariga tayanib, TASS xabar berdi.

Qayd etilishicha, joriy yilning dastlabki besh oyida O‘zbekistonga 465,8 ming nafar Rossiya fuqarosi sayyohlik maqsadida tashrif buyurgan. Taqqoslash uchun, 2025-yilning shu davrida bu ko‘rsatkich 334,2 ming kishini tashkil etgan.

Turistlar oqimining o‘sishi bahorgi ta’til davrida ham kuzatilgan. Xususan, 2026-yil may oyidagi bayram kunlarida O‘zbekistonga Rossiyadan 124 ming nafar mehmon kelgan. O‘tgan yilning shu davrida esa bu ko‘rsatkich 94,2 ming kishiga teng bo‘lgan. Natijada rossiyalik sayyohlar soni 30,8 ming nafarga ko‘paygan.

Umuman olganda, 2026-yilning yanvar–may oylarida O‘zbekiston 5,3 mlndan ortiq xorijiy sayyohni qabul qildi. Bu o‘tgan yilning mos davriga nisbatan 27,3% ga ko‘pdir.

Hisobot davrida mamlakatning turizm xizmatlari eksporti hajmi $2,2 mlrdni tashkil etdi.