Bank tizimida muammoli kreditlar ulushi 3,8% ni tashkil etmoqda — MB

2026-yil 1-oktabr holatiga O‘zbekiston bank tizimida muammoli kreditlar (NPL) hajmi 25 trln 41 mlrd so‘mga yetdi. Ularning jami kredit portfelidagi ulushi 3,8% ni tashkil etdi, deb xabar bermoqda Markaziy bank.

Taqdim etilgan ma’lumotlarga ko‘ra, bank tizimining umumiy kredit portfeli 659 trln 87 mlrd so‘mni tashkil qilgan.

Davlat ulushi mavjud banklarning jami kreditlari 425 trln 820 mlrd so‘mga, muammoli kreditlari esa 16 trln 943 mlrd so‘mga teng bo‘lgan. Ushbu banklarda NPL ulushi 4% ni tashkil etgan.

Boshqa banklarning kredit portfeli 233 trln 267 mlrd so‘m, muammoli kreditlari 8 trln 99 mlrd so‘m bo‘lgan. Ularda NPL ulushi 3,5% ni tashkil etgan.

NPL ulushi eng yuqori banklar

Banklar kesimida muammoli kreditlarning eng yuqori ulushi Madad Invest bankda qayd etilgan. Bankning 587 mlrd so‘mlik kredit portfelidan 255 mlrd so‘mi muammoli kreditlarga to‘g‘ri kelgan. Bu jami kreditlarning 43,4 foizini tashkil etadi.

Keyingi o‘rinlarda Poytaxt bank va TBC bank joylashgan. Poytaxt bankda NPL ulushi 13,8%, TBC bankda esa 13,4% bo‘lgan. Ularning muammoli kreditlari mos ravishda 103 mlrd va 1 trln 36 mlrd so‘mni tashkil etgan.

Xususiy banklar orasida Anor bankda muammoli kreditlar ulushi 9 foizga yetgan. AVO bankda bu ko‘rsatkich 6,9%, Garant bankda 6,1%, Tenge bankda esa 4,9% bo‘lgan.

Davlat ulushi mavjud banklar orasida eng yuqori NPL ko‘rsatkichi Mikrokreditbankda qayd etilgan — 11,4%. Bankning 24 trln 40 mlrd so‘mlik kredit portfelidan 2 trln 739 mlrd so‘mi muammoli kreditlardan iborat.

Biznesni rivojlantirish bankida NPL ulushi 5,8% ni, Asakabank va Xalq bankida esa 4,1% ni tashkil etgan.

Eng yirik kredit portfeliga ega banklar

Kredit portfeli hajmi bo‘yicha O‘zmilliybank va Agrobank yetakchilik qilmoqda. O‘zmilliybankning kreditlari 104 trln 78 mlrd so‘mga, Agrobankniki esa 95 trln 887 mlrd so‘mga teng.

Shuningdek, O‘zsanoatqurilishbankning kredit portfeli 59 trln 319 mlrd so‘mni, Kapitalbankniki 39 trln 890 mlrd so‘mni, Asakabankniki esa 39 trln 313 mlrd so‘mni tashkil etgan.

Muammoli kreditlarning mutlaq hajmi bo‘yicha ham O‘zmilliybank va Agrobank yuqori o‘rinlarda. O‘zmilliybankda NPL 3 trln 107 mlrd so‘m, Agrobankda esa 3 trln 180 mlrd so‘mni tashkil etgan.

NPL ulushi eng past banklar

Taqdim etilgan ma’lumotlarda KDB Bank O‘zbekiston, Oktobank va Uzum bankda muammoli kreditlar mavjud emasligi ko‘rsatilgan. Ularning kredit portfeli mos ravishda 4 trln 41 mlrd so‘m, 833 mlrd so‘m va 450 mlrd so‘mni tashkil etgan.

Apeks bankda NPL ulushi 0,1%, Open bankda 0,4%, Tayanch mikromoliya bankida esa 0,8% bo‘lgan.

Hamkorbank va Universal bankda muammoli kreditlar ulushi 1,5% dan, Ipak Yo‘li bank va Asia Alliance bankda esa 1,7% dan qayd etilgan.

Banklar kesimida kreditlar va NPL ko‘rsatkichlari

Quyidagi jadvalda 2026-yil 1-oktabr holatiga banklarning kredit portfeli, muammoli kreditlari va NPL ulushi keltirilgan. Barcha pul ko‘rsatkichlari mlrd so‘mda.