Misr o‘zbekistonliklar uchun yangi kirish qoidalarini joriy etishni 2027-yil martigacha kechiktirdi

O‘zbekiston fuqarolari uchun Misrga kirishning yangi qoidalari 2027-yil 1-martdan kuchga kiradi. Shu muddatgacha o‘zbekistonliklar mamlakatga avvalgi shartlar asosida borishlari mumkin. Bu haqda O‘zbekiston Tashqi ishlar vazirligi Instagram sahifasida ma’lum qildi.

Qarorni qayta ko‘rib chiqishga O‘zbekiston Tashqi ishlar vazirligi va mamlakatning Misrdagi elchixonasi tomonidan Misr tomoni bilan olib borilgan muzokaralar natijasida erishildi.

Tashqi ishlar vazirligi fuqarolarning xorijga safar qilish imkoniyatlarini kengaytirish, jumladan, vizasiz rejimlarni joriy etish va amaldagi chegara kesib o‘tish tartiblarini soddalashtirish bo‘yicha xorijiy hamkorlar bilan ishlashni davom ettiradi.

Avvalroq Kapital.uz 1-noyabrdan boshlab O‘zbekiston fuqarolari uchun Misrga kirish qoidalari o‘zgarishi haqida yozgan edi.