O‘zbekistonda shaxsga doir ma’lumotlarni uzatish mumkin bo‘lgan 49 ta davlat ro‘yxati tasdiqlandi

O‘zbekiston Vazirlar Mahkamasi fuqarolarning shaxsga doir ma’lumotlarini himoya qilishning yuqori darajasini ta’minlaydigan davlatlar ro‘yxatini tasdiqladi. Bu haqdagi tegishli hujjat Lex.uz portalida e’lon qilindi.

Mazkur ro‘yxatni joriy etish joriy yil mart oyida qabul qilingan “Shaxsga doir ma’lumotlar to‘g‘risida”gi qonunga kiritilgan o‘zgartirishlarda nazarda tutilgan. Unga ko‘ra, ma’lumotlarni yetarli darajada himoya qiladigan davlatlarda ayrim toifadagi shaxsga doir ma’lumotlarni saqlash va ularga ishlov berishga ruxsat beriladi.

Ro‘yxatni yangilash bo‘yicha takliflarni Ichki ishlar vazirligi huzuridagi Migratsiya va personallashtirish departamenti kiritadi.

Tasdiqlangan ro‘yxatga quyidagi 49 ta davlat va hudud kiritildi:

• Avstriya;
• Andorra;
• Argentina;
• Belgiya;
• Bolgariya;
• Braziliya;
• Buyuk Britaniya;
• Vengriya;
• Germaniya;
• Gernsi (Buyuk Britaniya);
• Gonkong (Xitoyning maxsus ma’muriy hududi);
• Gretsiya;
• Daniya;
• Jersi (Buyuk Britaniya);
• Isroil;
• Irlandiya;
• Islandiya;
• Ispaniya;
• Italiya;
• Kanada;
• Kipr;
• Latviya;
• Litva;
• Lixtenshteyn;
• Lyuksemburg;
• Malta;
• Men oroli (Buyuk Britaniya);
• Niderlandiya;
• Yangi Zelandiya;
• Norvegiya;
• Polsha;
• Portugaliya;
• Rossiya;
• Ruminiya;
• Singapur;
• Slovakiya;
• Sloveniya;
• AQSH;
• Urugvay;
• Farer orollari (Daniya);
• Finlyandiya;
• Fransiya;
• Xorvatiya;
• Chexiya;
• Shveysariya;
• Shvetsiya;
• Estoniya;
• Janubiy Koreya;
• Yaponiya.

Mazkur davlatlarga shaxsga doir va shaxssizlantirilgan ma’lumotlarni xalqaro axborot tizimlari orqali davlat organlarini oldindan xabardor qilmagan holda avtomatik tarzda uzatish mumkin bo‘ladi. Bunda aloqa kanallarining ma’lumotlar sizib chiqishidan himoyalangan bo‘lishi asosiy shart hisoblanadi.

Agar transchegaraviy uzatish jarayonida ma’lumotlar sizib chiqishi yoki xavfsizlik buzilishi aniqlansa, ma’lumotlar bazasi operatori bu haqda 24 soat ichida regulyatorni xabardor qilishi shart. Shuningdek, 72 soat ichida hodisa sabablari va uni bartaraf etish bo‘yicha ko‘rilayotgan choralarni o‘z ichiga olgan batafsil hisobot taqdim etilishi lozim.

Ro‘yxatga kiritilmagan davlatlarga ma’lumot uzatishga faqat alohida huquqiy va texnik talablar bajarilgan taqdirda ruxsat etiladi. Bunday holatlar uchun shartnomalar va himoya talablari Ichki ishlar vazirligi, Raqamli texnologiyalar vazirligi, Davlat xavfsizlik xizmati hamda Istiqbolli loyihalar milliy agentligi tomonidan tasdiqlanadi.