Sandro Rtveladze Ipoteka bank boshqaruvi raisi lavozimini tark etmoqda

2026-yil 1-iyuldan boshlab Sandro Rtveladze O‘zbekistondagi Ipoteka bank OTP Group boshqaruvi rahbari lavozimini tark etadi. Bu haqda moliya tashkiloti matbuot xizmati ma’lum qildi.

Xabarda qayd etilishicha, o‘tgan ikki yil davomida kredit muassasasi OTP Group nazoratiga o‘tishi munosabati bilan keng ko‘lamli transformatsiyadan o‘tgan. Kompaniya bu jarayon O‘zbekistonda davlat bankining ilk xususiylashtirilishi bo‘lgani va Yevropa moliyaviy guruhining mahalliy bozorga kirishini ta’minlaganini eslatdi.

Bank vakillari ma’lumotiga ko‘ra, rahbariyat almashishidan avval tuzilma asosan davlat instituti sifatida faoliyat yuritgan va yirik ipoteka kreditlari portfeliga ega bo‘lgan. Rtveladze faoliyati davrida operatsion jarayonlar qayta tashkil etildi, kapital hajmi oshirildi, aktivlar sifati yaxshilandi va rentabellik tiklandi.

Kompaniya pozitsiyasiga ko‘ra, amalga oshirilgan choralar biznesning barqaror modelini shakllantirish hamda tizimni bosh kompaniyaning risklarni boshqarish standartlariga moslashtirish imkonini berdi. Shuningdek, bank yangi top-menejerlar jamoasi shakllantirilgani va kelgusi rivojlanish uchun zarur asos yaratilganini ma’lum qildi.

Bank kuzatuv kengashi raisi va OTP Group bosh direktori o‘rinbosari Laslo Volf transformatsiya jarayoni yangi standartlar asosida yakunlanganini ta’kidlab, ketayotgan rahbarga amalga oshirgan ishlari uchun minnatdorlik bildirdi.

Sandro Rtveladze esa o‘z izohida guruh rahbariyatiga bildirilgan ishonch uchun tashakkur bildirib, erishilgan natijalar jamoaning umumiy mehnati samarasi ekanini qayd etdi.

Eslatib o‘tamiz, Sandro Rtveladze 2024-yilda Ipoteka bank boshqaruvi raisi etib tayinlangan va bu lavozimda Elyor Inomjonov o‘rnini egallagandi. Ungacha u TBC Bank Uzbekistan, UBS, Liberty Bank hamda OTP’ning Rossiyadagi filialida rahbarlik lavozimlarida faoliyat yuritgan. Top-menejer University of Oxford va Jacobs University Bremen magistrlik darajalariga ega.